მოსამართლეების კეთილსინდისიერების შემოწმება სხვა არაფერია თუ არა სასამართლო სისტემის წმენდა, რაც ვენეციის კომისიას არ უთქვამს და ასეთი რეკომენდაცია არ გაუცია, - ამის შესახებ პარლამენტის იურიდიულ საკითხთა კომიტეტის თავმჯდომარემ ანრი ოხანაშვილმა განაცხადა.

ანრი ოხანაშვილის განცხადებით, ვენეციის კომისიას არც ე.წ. ვეტინგის სისტემის დანერგვა არ მოუთხოვია და მხოლოდ ამ საკითხის განხილვისა და მსჯელობის შესაძლებლობაზეა საუბარი.

„რა მეტყველებს იმაზე, რომ საქართველოში ისეთი კონტექსტია, რომელიც მოსამართლეებში კეთილსინდისიერების შემოწმებას საჭიროებს. გულწრფელად მინდა გითხრათ, რომ სინამდვილეში კეთილსინდისიერების შემოწმება სხვა არაფერია თუ არა სასამართლო სისტემის წმენდა, რაც ვენეციის კომისიას არ უთქვამს და ასეთი რეკომენდაცია არ გაუცია. ვენეციის კომისიას არ გაუცია რეკომენდაცია, რომ ჩაატარეთ სასამართლოს წმენდა და ჩაატარეთ „ვეტინგი“. ასეთი რამ არ უთქვამს. ვენეციის კომისიამ აღნიშნა, რომ არსებობდა ასეთი მოსაზრება სხვადასხვა სუბიექტებთან შეხვედრის დროს, ოპოზიციას აქვს გამოხატული პოზიცია, რომ ისინი არ ენდობიან სასამართლოს, ამ ხალხს აქვს პოლიტიკური ინტერესები. „ვეტინგის“ კონტექსტში საუბრის დროს ვენეციის კომისიამ აღნიშნა, რომ საუბარია იმაზე, რომ ეს საკითხი შესაძლებელია იქნას განხილული პოლიტიკურ ჯგუფებს შორის და გახდეს მსჯელობის საგანი. ამ ჩანაწერსა და იმ ჩანაწერს შორის, რომ ვენეციის კომისიამ მოითხოვა, რომ „ვეტინგის“ პროცესი წარმართეთო, არის რადიკალურიო განსხვავება“, - განაცხადა ანრი ოხანაშვილმა.