მიუხედავად იმისა, რომ დღეს საქართველოს წინაშე დგას არაერთი უმწვავესი ფუნდამენტური გამოწვევა - საგარეო საფრთხეები, რუსეთი, კორუფცია და სხვა, მთავარი მაინც ერთადერთია, საქართველოში დემოკრატიული პროცესის არარსებობა და გამოწვევა, რომელიც დაკავშირებულია 2024 წლის არჩევნებთან - თუ ჩვენი ქვეყანა ამ ტესტს წარმატებით ჩააბარებს, ჩავთვალოთ, რომ ყველა სხვა გამოწვევაც წარმატებით იქნება დაძლეული,- ამის შესახებ პარლამენტის დამოუკიდებელმა დეპუტატმა არმაზ ახვლედიანმა „რონდელის უსაფრთხოების კონფერენციაზე” ჟურნალისტებს განუცხადა.

მისი თქმით, საქართველოზე ვერავინ ისეთ უარყოფით გავლენას ვერ მოახდენს, როგორც თავად ქვეყნის ხელისუფლება, თუ მას არჩევნების ნორმალურად ჩასატარებლად პოლიტიკური ნება არ ექნება.

„უნდა ვიცოდეთ, რომ მიუხედავად იმისა, რა მზაკვრული გეგმა აქვს რუსეთს საქართველოსთან მიმართებით, ვერც რუსეთი და ვერც ვერავინ სხვა ვერ შეძლებს ისეთი უარყოფითი გავლენის ქონას ჩვენს ქვეყანაზე, როგორც ჩვენ თვითონ, ჩვენი ხელისუფლება, თუ მას არ ექნება საკმარისი პოლიტიკური ნება, რომ არჩევნები ნორმალურად ჩატარდეს. ეს არის უმთავრესი გამოწვევა. აქვეა სასამართლოს პრობლემაც - უნდა ვხვდებოდეთ, რომ სანამ სასამართლო არ გათავისუფლდება პარტიულ-პოლიტიკური წნეხისგან, ჩვენი საზოგადოებისთვის მუდამ იქნება პრობლემა და მუდამ იქნება მთავარი პრობლემა ჩვენი პარტნიორებისთვის“, - განაცხადა არმაზ ახვლედიანმა.