საფრანგეთი ღიად ახორციელებს ზეწოლისა და დისკრიმინაციის პოლიტიკას მუსლიმების მიმართ და სხვადასხვა ისლამოფობიურ კამპანიას აწყობს, - ამის შესახებ აზერბაიჯანის პრეზიდენტმა, ილჰამ ალიევმა ბაქოში, საერთაშორისო კონფერენციაზე განაცხადა, რომლის თემაა : „მრავალფეროვნების დაცვა: ისლამოფობიასთან ბრძოლა 2024 წელს“.

„საფრანგეთი, თავის ტრადიციულ ნეოკოლონიალიზმის პოლიტიკასთან ერთად, ღიად ახორციელებს მუსლიმებზე ზეწოლისა და მათ მიმართ დისკრიმინაციის პოლიტიკას და აწყობს სხვადასხვა ისლამოფობიურ კამპანიებს“, - აღნიშნა ალიევმა.

მისივე თქმით, საფრანგეთი “სეკულარიზმის საფარქვეშ” იღებს კანონმდებლობებს და პოლიტიკურ გადაწყვეტილებებს, რომლებიც მიზნად ისახავს მხოლოდ მუსლიმთა უფლებებისა და თავისუფლებების შეზღუდვას.

“ამ ქვეყანაში მეჩეთები, მუსლიმური კულტურული ცენტრები და სასაფლაოები ექვემდებარება სხვადასხვა სახის შეურაცხყოფას და ავიწროებენ მუსლიმ მოქალაქეებს,” - განაცხადა ალიევმა.

როგორც აზერბაიჯანის პრეზიდენტმა აღნიშნა, ისლამოფობიის ტენდენციები მსოფლიოში სწრაფად იზრდება.

„სამწუხაროდ, ისლამოფობია ამჟამად არის მრავალი დასავლური სახელმწიფოს სახელმწიფო პოლიტიკის განუყოფელი ნაწილი, რომლებიც თავს დემოკრატიულად თვლიან“, - აღნიშნა აზერბაიჯანის პრეზიდენტმა.

მისი მტკიცებით, ისლამის საწინააღმდეგო საქმიანობაში ჩართულია ზოგიერთი დასავლური ინსტიტუტიც.

"დღეს ევროპარლამენტი და ევროპის საბჭოს საპარლამენტო ასამბლეა გადაიქცა ისლამოფობიის პროპაგანდირების და ამ იდეოლოგიაზე დაფუძნებული პოლიტიკის გატარების პლატფორმებად. არსებული ნეგატიური ტენდენცია გამოიხატება ზოგიერთი გლობალური მედია სტრუქტურის საქმიანობაშიც", - აღნიშნა ალიევმა.