თბილისის საქალაქო სასამართლოში 7 ნოემბრის საქმეზე საქართველოს ყოფილი პრეზიდენტის, მიხეილ სააკაშვილის და მასთან ერთად ბრალდებული ყოფილი მაღალჩინოსნების სასამართლო პროცესი მიმდინარეობს. დღევანდელ პროცესზე ბრალდების მხარის მტკიცებულებებს გამოიკვლევენ, ასევე დაიკითხებიან მოწმეებიც.

სხდომას კლინიკა „ვივამედიდან“ დისტანციურად ჩაერთვება ბრალდებული მიხეილ სააკაშვილი. 7 ნოემბრის საქმეს პოლიტიკურად მოტივირებულს უწოდებს სააკაშვილის ადვოკატი, ბექა ბასილაია.

„მოცემულ საქმეში, მიხეილ სააკაშვილის წინააღმდეგ არ არსებობს არც პირდაპირი და არც ირიბი მტკიცებულება და ვერც იარსებებს იმიტომ, რომ 7 ნოემბერს სახელმწიფოს მიერ განხორციელებული ქმედებები, საპოლიციო ღონისძიებები კონკრეტულ საჭიროებებთან იყო დაკავშირებული,კონკრეტული გარემოებებით განპირობებული ქმედებები, რასთანაც პრეზიდენტის სამართლებრივი კავშირი არ არსებობს”, - აცხადებ ბექა ბასილაია.

ცნობისთვის, სახელმწიფო ბრალდება მიხეილ სააკაშვილს 2007 წლის 7 ნოემბერს, მომიტინგეთა მასობრივად დარბევას, ტელეკომპანია „იმედში“ შეჭრასა და ბადრი პატარკაციშვილის კუთვნილი ქონების დანაშაულებრივად ხელში ჩაგდებას ედავება.

საქართველოს ყოფილ პრეზიდენტს ბრალი საქართველოს სისხლის სამართლის კოდექსის 333-ე მუხლის მესამე ნაწილით აქვს წარდგენილი, რაც სამსახურებრივი უფლებამოსილების გადამეტებას გულისხმობს, რამაც ფიზიკური, ან იურიდიული პირის უფლების, საზოგადოების, ან სახელმწიფოს კანონიერი ინტერესის არსებითი დარღვევა გამოიწვია. აღნიშნული ბრალი სასჯელის სახედ და ზომად 5-დან 8 წლამდე ვადით თავისუფლების აღკვეთას ითვალისწინებს.

აღნიშნულ საქმეში სააკაშვილთან ერთად ბრალდებულები არიან ვანო მერაბიშვილი, ზურაბ ადეიშვილი, დავით კეზერაშვილი და გიგი უგულავა.