საგარეო საქმეთა მინისტრის ილია დარჩიაშვილის განცხადებით, ევროკავშირის და გერმანიის ელჩებთან შეხვედრისას გამოხატა საქართველოს ხელისუფლების პოზიცია, რომ მათთვის მიუღებელია საქართველოს იუსტიციის ყოფილი მინისტრის, ზურაბ ადეიშვილის ვიზიტი.

როგორც დარჩიაშვილმა მთავრობის სხდომის დასრულების შემდეგ ბრიფინგზე აღნიშნა, მათი პოზიციაა, რომ კრიმინალები მსგავსი ტიპის ღონისძიებებში არ უნდა მონაწილეობდნენ.

„დღეს შეხვედრა მქონდა ევროკავშირს ელჩთან და ასევე გერმანიის ელჩთან საქართველოში. ჩვენ ამ შეხვედრების ფორმატში გამოვხატეთ შეშფოთება იმ ფაქტთან დაკავშირებით, რომლის მომსწრენიც გავხდით და ვნახეთ, რომ ის ადამიანი კონკრეტულ შეხვედრებში მონაწილეობდა. მიგვაჩნია, რომ საქართველოს კანონმდებლობით მჯავრდებული ადამიანები, რომლებიც მძიმე დანაშაულებში არიან ეჭვმიტანილები და ბრალდებულები, არ უნდა იღებდნენ მსგავსი ტიპის საჯარო აქტივობებში მონაწილეობას ჩვენს პარტნიორ და მეგობარ ქვეყნებში. შესაბამისად, მქონდა შესაძლებლობა, ელჩებთან ამ საკითხზე მესაუბრა. ზოგადად, ბოლო პერიოდში ჩვენ გვახსოვს კიდევ სხვა ადამიანებიც, რომლებიც თავისუფლად გადაადგილდებიან ევროკავშირის შიგნით, რომელთა მიმართაც ძალიან მძიმე ბრალდებები არსებობს. ვფიქრობ, ჩვენ მსგავსი ტიპის რეაქცია ჩვენს მეგობართან უნდა გამოგვეხატა. ჩვენთვის მიუღებელია, რომ ძალიან მძიმე დანაშაულებში ბრალდებული ადამიანები ასეთი ტიპის საჯარო ღონისძიებებში მონაწილეობდნენ, ესწრებოდნენ შეხვედრებს, რომელსაც ჩვენი უახლოესი მეგობრები და პარტნიორები მართავენ“,-განაცხადა დარჩიაშვილმა.

საგარეო უწყების ხელმძღვანელის თქმით, ეს არის ის საკითხი, რომლის განხილვას საგარეო საქმეთა სამინისტრო პარტნიორებთან მომავალშიც გააგრძელებს.

როგორი იყო ელჩების პოზიცია ამ საკითხზე, მინისტრმა არ დააკონკრეტა.

„არ იქნება სწორი ჩვენი საუბრის გამოტანა. ელჩებთან დაფიქსირდა პოზიცია, რომ ჩვენ შეშფოთებული ვართ იმით, რაც ვიხილეთ. მიგვაჩნია, რომ კრიმინალები მსგავსი ტიპის შეხვედრებში არ უნდა მონაწილეობდნენ“,-განაცხადა დარჩიაშვილმა.