თურქეთის პრეზიდენტ რეჯეფ თაიფ ერდოღანის განცხადებით, სამშვიდობო გეგმები, რუსეთის მონაწილეობის გარეშე, შედეგს არ გამოიღებს.

„გამოვხატეთ რა უკრაინის სუვერენიტეტისა და ტერიტორიული მთლიანობისადმი მხარდაჭერა, ჩვენ უკვე განვაცხადეთ, რომ სამშვიდობო გეგმები, რომლებიც გამორიცხავს რუსეთს, არანაირ შედეგს არ გამოიღებს“, - აღნიშნა ერდოღანმა.

ამასთან, მისი თქმით, აუცილებელია, თავიდან იქნას აცილებული ნებისმიერი ნაბიჯი, რამაც შეიძლება გამოიწვიოს უკრაინაში მიმდინარე ომის ესკალაცია და კონფლიქტის შესაძლო გავრცელება ჩრდილოატლანტიკური ალიანსის წევრებზე.

გასულ კვირას, რეჯეფ თაიფ ერდოღანმა, ვლადიმერ ზელენსკის ანკარაში ვიზიტის დროს განაცხადა, რომ მისი ქვეყანა მზადაა, უმასპინძლოს „მშვიდობის სამიტს“ უკრაინასა და რუსეთს შორის მოლაპარაკებებისთვის.