ჩინეთი თავისი უფლებებისა და ინტერესების დასაცავად ყველა საჭირო ზომას მიიღებს, - ამის შესახებ განცხადება ჩინეთის კომერციის სამინისტრომ აშშ-ის წარმომადგენელთა პალატის მიერ TikTok-ის შესაძლო აკრძალვის შესახებ კანონპროექტის მიღების შემდეგ გაავრცელა.

„აშშ-მა საბაზრო ეკონომიკისა და სამართლიანი კონკურენციის პრინციპებს პატივი უნდა სცეს და უცხოური კომპანიების უსამართლო ჩაგვრა უნდა შეწყვიტოს. ჩინეთი თავისი ლეგიტიმური უფლებებისა და ინტერესების დასაცავად ყველა საჭირო ზომას მიიღებს“, - განაცხადა ჩინეთის კომერციის სამინისტროს წარმომადგენელმა.

TikTok-ის აღმასრულებელმა დირექტორმა, შოუ ზი ჩიუმ აპლიკაციის ამერიკელ მომხმარებლებს მოუწოდა, რომ თავიანთი კონსტიტუციური უფლებები დაიცვან.

„ჩვენ გვჯერა, რომ ამას ერთად დავძლევთ, დაიცავით თქვენი კონსტიტუციური უფლებები. გააგონეთ მათ თქვენი ხმა“, - აღნიშნა TikTok-ის აღმასრულებელმა დირექტორმა.

ცნობისთვის, გუშინ, აშშ-ის წარმომადგენელთა პალატამ კანონპროექტი მიიღო, რომელიც სოციალურ ქსელს, TikTok-ს 5 თვეს აძლევს, რათა მფლობელ ჩინურ კომპანიასთან, ByteDance-თან კავშირი გაწყვიტოს, წინააღმდეგ შემთხვევაში აპლიკაცია აშშ-ში აიკრძალება.