საქართველოს პრემიერ-მინისტრის, ირაკლი კობახიძის განცხადებით, ბრიუსელში ვიზიტის შემდეგ, ის მეზობელ ქვეყნებში ვიზიტებს გეგმავს.

კონკრეტულად, ირაკლი კობახიძის ვიზიტი აზერბაიჯანში 16 მარტს არის დაგეგმილი, ხოლო სომხეთში პრემიერი მომავალ კვირაში ჩავა.

როგორც პრემიერ-მინისტრმა ჟურნალისტებთან აღნიშნა, მეზობელ ქვეყნებში ვიზიტების ერთ-ერთი საკითხი რეგიონში მშვიდობის შენარჩუნება იქნება, რაშიც საქართველო ყოველთვის მნიშვნელოვან როლს ასრულებდა.

„მეზობელ ქვეყნებთან ურთიერთობების გაღრმავება ერთ-ერთი უმთავრესი პრიორიტეტია. აქედან გამომდინარე, შემთხვევითი არ არის, რომ ბრიუსელში ვიზიტის შემდეგ, მეზობელ ქვეყნებს ვეწვევი. შაბათს ვიზიტი გვაქვს აზერბაიჯანში, ერთ კვირაში - სომხეთში.

ყველა მნიშვნელოვან საკითხს შევეხებით. ასეთია, რეგიონში მშვიდობის შენარჩუნება, რაშიც, როგორც იცით, საქართველო ყოველთვის მნიშვნელოვან როლს ასრულებდა. ორმხრივი ურთიერთობების გასაღრმავებლად ყველაფერს გავაკეთებთ“, - განაცხადა ირაკლი კობახიძემ.