ნაბიჯები გადადგმულია იქეთ, რომ ერთპარტიული უმრავლესობის მიერ ცესკოზე დიქტატი გაიზარდოს. “ლელოს“ ამისი არ ეშინია, რაც არ უნდა ცვლილებები შეიტანონ, ხალხის ნებას ვერაფრით შეეწინააღმდეგებიან, - ამის შესახებ "ლელოს" ერთ-ერთმა ლიდერმა, დავით უსუფაშვილმა ჟურნალისტებთან საუბრისას განაცხადა.

მისივე თქმით, „საარჩევნო კოდექსში“ შესატანი ცვლილებები ქვეყნის მდგომარეობას ართულებს, ვინაიდან, ეს ნიშნავს, რომ ევროკავშირის მიერ შემოთავაზებული რეკომენდაციებიდან ერთ-ერთი არ სრულდება.

„გადაიდგა სამი ძალიან დიდი ნაბიჯი უკან. კერძოდ, პრეზიდენტს უფლებამოსილება შემცირდა ცესკოს დაკომპლექტების პროცესში და გაიზარდა პარლამენტის თავმჯდომარის უფლებამოსილება, ცესკოს თავმჯდომარის შესარჩევის კვორუმი დაიწია, ოპოზიციის წარმომადგენელი ცესკოს თავმჯდომარის მოადგილის თანამდებობა უქმდება. ანუ, სამივე ნაბიჯი გადადგმულია იქეთ, რომ ერთპარტიული უმრავლესობის მიერ, დამოუკიდებელ კონსტიტუციურ ორგანოზე - ცესკოზე გაიზარდოს დიქტატი. „ლელოს“ ამისი არ ეშინია. რაც არ უნდა ცვლილებები შეიტანონ ხალხის ნებას ვერაფრით შეეწინააღმდეგებიან, უბრალოდ ეს ართულებს ქვეყნის მდგომარეობას, ვინაიდან, ეს ყველაფერი სრულიად ცალსახად ნიშნავს, რომ ევროკავშირის მიერ შემოთავაზებული 9 რეკომენდაციიდან მეოთხეს ხელისუფლება არ ასრულებს“, - განაცხადა უსუფაშვილმა.