რომელი ქვეყანაა, რომელიც მოგწონთ და იქ მიგრაცია არ არის? წელიწადში, დაახლოებით, 9,4 მილიონი მოქალაქე ტოვებს ამერიკას და ემიგრაციაში მიდის და ამისთვის შეგიძლიათ ამერიკის მთავრობა გააკრიტიკოთ? - ასე მიმართა პარლამენტის თავმჯდომარის მოადგილე არჩილ თალაკვაძემ ოპოზიციონერებს საქართველოში მიგრაციაზე საუბრისას.

როგორც მან პარლამენტში სიტყვით გამოსვლისას განაცხადა, მიგრაცია საერთაშორისო პრობლემაა და საქართველოში ოპოზიცია იმიტომ უსვამს ამ პრობლემას ხაზს, რომ მათ „გაკოტრებული დღის წესრიგი“ აქვთ და არ იციან, რაზე ისაუბრონ.

არჩილ თალაკვაძის თქმით, ქვეყანაში ბევრი პრობლემა ჯერ კიდევ მოუგვარებელი რჩება, მაგრამ მთავრობას აქვს გეგმა და ჰყავს გუნდი, რომელიც ამას მოაგვარებს.

„მე მინდა კიდევ ერთხელ შევახსენო საზოგადოებას, რომ საქართველოდან წასული მოქალაქეების რეკორდი „ნაციონალური მოძრაობის“ ხელისუფლებას ეკუთვნის. უარყოფითი სალდოც ანუ განსხვავება ემიგრაციაში წასულთა და დაბრუნებულებს შორის მათი რეკორდია. მხოლოდ სტრასბურგსა და ევროსასამართლოში სამართლის საძებნად წასული მოქალაქეების რაოდენობაც გეყოფათ იმისთვის, რომ მიგრაციაზე ხმა არ ამოიღოთ. ყოველ წელს უამრავი ადამიანი მიდიოდა, თქვენგან დაჩაგრული, საფრანგეთში სამართლის საძებნელად, შრომით და ეკონომიკურ მიგრაციას თავი რომ დავანებოთ. ვინ ამბობს, რომ მიგრაცია პრობლემა არ არის? ეს საერთაშორისო პრობლემაა და ეკონომიკურად განვითარებული ქვეყნებიდანაც კი მიდიან ადამიანები.

ოპოზიციას მივმართავ - რომელი ქვეყანაა, რომელიც მოგწონთ და იქ მიგრაცია არ არის? ევროკავშირის მიგრაცია გაინტერესებთ თუ ამერიკის შეერთებული შტატების? წელიწადში, დაახლოებით, 9,4 მილიონი მოქალაქე ტოვებს ამერიკას და ემიგრაციაში მიდის და ამისთვის შეგიძლიათ ამერიკის მთავრობა გააკრიტიკოთ? წელიწადში, 1 100 000 ადამიანი ტოვებს ევროკავშირს და არაევროკავშირის წევრ ქვეყანაში მიდის. მარტო ევროკავშირის შიგნით წელიწადში მილიონ-ნახევარია მიგრაცია. თქვენ გაკოტრებული დღის წესრიგი გაქვთ, არ იცით რაზე ილაპარაკოთ.

რა თქმა უნდა, ქვეყანაში ბევრი პრობლემა რჩება, მაგრამ ჩვენ გვაქვს გეგმა და გვყავს გუნდი, რომელიც ამ პრობლემებს მოაგვარებს“, - განაცხადა არჩილ თალაკვაძემ.