საქართველოს ფინანსთა მინისტრი აზიის განვითარების ბანკის პრეზიდენტს შეხვდა
საქართველოს ფინანსთა მინისტრი ლაშა ხუციშვილი აზიის განვითარების ბანკის (ADB) პრეზიდენტს, მასაცუგუ ასაკავას და ბანკის სხვა ხელმძღვანელ პირებს შეხვდა.
ფინანსთა სამინისტროს ცნობით, შეხვედრას, რომელიც ფილიპინების რესპუბლიკის დედაქალაქ მანილაში, აზიის განვითარების ბანკის სათავო ოფისში გაიმართა, ასევე, დაესწრო ფინანსთა მინისტრის მოადგილე ეკატერინე გუნცაძე.
„მხარეებმა განიხილეს საქართველოსა და აზიის განვითარების ბანკს შორის თანამშრომლობის საკითხები და ბანკის მიერ ქვეყანაში დაფინანსებული პროექტების მიმდინარეობა.
ყურადღება გამახვილდა მიმდინარე წლის 2-5 მაისს ADB-ის 57-ე ყოველწლიური შეხვედრის საქართველოში ჩატარების მნიშვნელობაზე.
აზიის განვითარების ბანკის პრეზიდენტმა მაღალი შეფასება მისცა საქართველოს მიერ ყოველწლიური შეხვედრის მოსამზადებელ სამუშაოებს და გამოთქვა რწმენა, რომ ქვეყანა წარმატებით უმასპინძლებს ამ მასშტაბურ ღონისძიებას.
მხარეებმა, ასევე, განიხილეს აზიის განვითარების ბანკის საქართველოსთან თანამშრომლობის ახალი სტრატეგია, რომელიც ხელს შეუწყობს ქვეყანას განავითაროს მწვანე და ინკლუზიური ეკონომიკა. სტრატეგიაში განსაკუთრებული ყურადღება ეთმობა რეგიონულ თანამშრომლობასა და ინტეგრაციას, ასევე კერძო სექტორის ხელშეწყობას, ადამიანური კაპიტალის განვითარებასა და კლიმატის ცვლილებას“,- აღნიშნულია ინფორმაციაში.
