2024 წლის აპრილში მკითხველს „ბომონდის“ გუნდისგან სიახლე ელოდება - ჟურნალი განახლებული კონცეფციით ბრუნდება და აქტუალურ და საინტერესო თემებს გააერთიანებს.

ახალი ნიშური გამოცემის სახელიც განსხვავებული და მისი კონცეფციის შესაბამისი იქნება - „თანა by ბომონდი“. ძველი ქართული სიტყვების ლექსიკონის თანახმად, „თანა“ ნიშნავს მრჩეველს და ჟურნალიც ერთგვარი გზამკვლევი იქნება მოდის, კულტურის, თავის მოვლის, ჯანსაღი ცხოვრების წესისა და მოგზაურობის შესახებ.

ის მოიცავს საავტორო სტატიებს მსოფლიოს უდიდესი მოდის სახლების, ამავე სფეროში არსებული თანამედროვე ტექნოლოგიების, დიზაინერების სიმბოლური ნამუშევრების, სილამაზისა და კულტურის სფეროში მოღვაწე მნიშვნელოვანი პიროვნებების, სამოგზაურო მიმართულებების, კულინარიის სფეროში არსებული ტენდენციებისა და სხვა საკითხების გარშემო. ამასთან, მკითხველს საშუალება ექნება, შთამბეჭდავი ფოტონამუშევრების მეშვეობით სულ სხვა თვალით დაინახოს თბილისი. როგორც აღნიშნული, ისე სხვა ფოტორეპორტაჟები მკითხველს სხვადასხვა სფეროს შესახებ სრულიად განსხვავებული კუთხით მოუთხრობს.

როგორც „თანა by ბომონდის“ მთავარი რედაქტორი, თეა აგლაძე განმარტავს, მკითხველს ელოდება ახალი გამოცემა, რომელიც ერთდროულად მის შთაგონებასა და განტვირთვაზე იზრუნებს:

„ვფიქრობ, ბეჭდური გამოცემის არსებობა ძალიან მნიშვნელოვანია და დღეს ამ საქმის კეთება დიდი გამოწვევაა. სამყარო შეცვლილია და სხვა პრიორიტეტები და თემებია უფრო აქტუალური. ციფრულ სივრცეში გაბნეული უამრავი ინფორმაციის მიუხედავად ადამიანს სჭირდება გადაფურცლოს გამოცემა და მისი თაროზე შენახვა გადაწყვიტოს. შემდეგ კი შთაგონებისთვის, საჭირო ინფორმაციისთვის და უბრალოდ კარგი ტექსტის წასაკითხად დაუბრუნდეს. ვფიქრობ მე და ჩემმა შესანიშნავმა, განახლებულმა გუნდმა დიდი სამუშაო გავწიეთ, შეგვეგროვებინა და თქვენამდე მოგვეტანა ექსპერტული და საავტორო რჩევები. გვიხარია რომ მალე ჩვენი „თანა-მონაწილეობით“ რაღაც ახლის გაგებაში და უკვე გაგებულის ჩვენებურ ინტერპრეტაციებში გამოგზაურებთ“, - აღნიშნა თეა აგლაძე.

(R)