თბილისის საკრებულოს დელეგაცია ევროპის საბჭოს ადგილობრივ და რეგიონულ ხელისუფლებათა კონგრესის 46-ე პლენარულ სესიაში მონაწილეობს

სტრასბურგში ევროპის საბჭოს ადგილობრივ და რეგიონულ ხელისუფლებათა კონგრესის 46-ე პლენარული სესია მიმდინარეობს.

როგორც თბილისის საკრებულოს მიერ გავრცელებულ ინფორმაციაშია ნათქვამი, სესიაში თბილისის საკრებულოს თავმჯდომარე გიორგი ტყემალაძე, მისი მოადგილე ზურაბ აბაშიძე, ფრაქცია „ქართული ოცნება - დემოკრატიული საქართველოს“ თავმჯდომარე ოთარ გრიგოლია, საკრებულოს წევრი, საქართველოს ადგილობრივ თვითმმართველობათა ეროვნული ასოციაციის აღმასრულებელი დირექტორი ნინო რუხაძე და იურიდიულ საკითხთა და ადამიანის უფლებათა დაცვის კომისიის თავმჯდომარის მოვალეობის შემსრულებელი არჩილ გორდულაძე მონაწილეობენ.

„ევროპის საბჭოს ადგილობრივ და რეგიონულ ხელისუფლებათა კონგრესის 46-ე პლენარულ სესიაზე, რომელიც კონგრესის პრეზიდენტმა მარკ ქულსიმ და ევროსაბჭოს გენერალურმა მდივანმა მარია პეიჩინოვიჩ ბურიჩმა გახსნეს, უკრაინის წინააღმდეგ რუსეთის ფედერაციის მიერ წარმოებული ომის თაობაზე გაიმართა დებატები. აგრეთვე კენჭი ეყარა დეკლარაციის პროექტს უკრაინელი ბავშვების უფლებების დაცვის შესახებ. ამას გარდა, კონგრესის 46-ე სესიაზე დებატები გაიმართა ისეთ თემებზე, როგორებიცაა: ადგილობრივი და რეგიონული ხელისუფლებები, როგორც კანონის უზენაესობის მოქმედი პირები და გარანტორები; გარემოსდაცვითი საკითხები; ადგილობრივი და რეგიონული პასუხები ბუნებრივ კატასტროფებსა და კლიმატურ რისკებზე; გაეროს მომავლის სამიტი; ჩარჩო კონვენციის პროექტი ადამიანის უფლებებზე, დემოკრატიასა და კანონის უზენაესობაზე და სხვა.

კონგრესზე ასევე წარმოდგენილი იქნება იტალიის, ნორვეგიის, ანდორის, მონტენეგროს, საფრანგეთის, ხორვატიის ადგილობრივ თვითმმართველობებში ევროპული ქარტიის განხორციელების მონიტორინგის ანგარიშები. კონგრესის წევრები გაეცნობიან და კენჭს უყრიან მოლდოვაში ჩატარებული ადგილობრივი არჩევნების სადამკვირვებლო მისიის ანგარიშს. ევროპის საბჭოს მინისტრთა კომიტეტში, ლიხტენშტეინის თავმჯდომარეობის ფარგლებში, კონგრესს სიტყვით მიმართავს პრემიერ-მინისტრის მოადგილე, შინაგან საქმეთა, ეკონომიკისა და გარემოსდაცვის მინისტრი საბინე მონაუნი. სესიის მსვლელობისას დაგეგმილია მოსაზრებების გაზიარება თემაზე: ადგილობრივი და რეგიონული ხელისუფლებების როლი ბელარუსული დემოკრატიული ძალებისა და სამოქალაქო საზოგადოების მხარდაჭერაში“,- ნათქვამია ინფორმაციაში.