მაშინ, როდესაც მოსახლეობა გაღარიბდა, ღარიბაშვილი და ივანიშვილის მთავრობის წევრები ხალხის ხარჯზე მილიონერები გახდნენ, - ამის შესახებ თბილისის საკრებულოს „ერთიანი ნაციონალური მოძრაობის“ თავმჯდომარემ, ირაკლი ნადირაძემ განაცხადა.

მისივე თქმით, პარტია „ქართული ოცნების“ დამფუძნებლის, ბიძინა ივანიშვილის „მთავრობის მთავარი საზრუნავი არის არა გაზრდილი ფასები, უმუშევრობა, არამედ ის, რომ მას და მის გარემოცვას დამატებითი მილიონები ხალხის ხარჯზე ეშოვათ“.

„ფაქტია, რომ მაშინ, როდესაც ჩვენი მოსახლეობა გაღარიბდა, ღარიბაშვილი მილიონერი გახდა, ისევე როგორც ბიძინა ივანიშვილის მთავრობის ძალიან ბევრი წევრი. ღარიბაშვილმა გვითხრა, რომ პენსიონერმა მამამ აჩუქა 150 ათასი ლარი, არადა ამ ქვეყანაში ასობით ათას პენსიონერს საპენსიო სესხი ვერ დაუფარავს და თვიდან თვემდე თავი ვერ გააქვს. ეს ყველაფერი არის ჩვენი მოქალაქეების დაცინვა და სხვა არაფერი. ივანიშვილის მთავრობის მთავარი საზრუნავი არის არა გაზრდილი ფასები, უმუშევრობა, არა ის, რომ ასი ათასზე მეტი ადამიანი ქვეყნიდან არის წასული, არამედ ის, რომ მას და მის გარემოცვას დამატებითი მილიონები ხალხის ხარჯზე ეშოვათ“, - განაცხადა ირაკლი ნადირაძემ, რომლის განცხადებასაც პარტია „ნაციონალური მოძრაობის“ პრესსამსახური ავრცელებს.