UNICEF - ღაზაში ცეცხლის შეწყვეტის შესახებ გაერო-ს რეზოლუციამ ადამიანებს იმედი ჩაუსახა, მაგრამ ეს იმედი ისრაელის ბომბებმა ჩაახშო
გაეროს ბავშვთა ფონდის (UNICEF) პრესსპიკერის, ჯეიმს ელდერის განცხადებით, ღაზის სექტორში ადამიანებს იმედი ჩაესახათ, როდესაც გაეროს უშიშროების საბჭომ ცეცხლის დაუყოვნებლივ შეწყვეტის შესახებ რეზოლუცია მიიღო, მაგრამ ეს იმედი გაქრა, რადგან ისრაელის მიერ ანკლავის დაბომბვა გრძელდება.
”როდესაც ეს განცხადება გაკეთდა, იყო ამოსუნთქვა, იყო საგრძნობი შვება, მაგრამ ეს იმედი ბომბებმა ჩაახშო. ამჟამად ეს არაფერს ნიშნავს. მძევლები ისევ აქ არიან, დაბომბვები გრძელდება, დახმარებაზე შეზღუდვები გრძელდება“, - აღნიშნა ჯეიმს ელდერმა.
მისი თქმით, ღაზაში პირობები მასიურად გაუარესდა, საკვებთან დაკავშირებით მდგომარეობა სწრაფად უარესდება.
”ყველაფერი უარესდება. სამწუხაროდ, ყველას ცხოვრება გაუარესდა ისეთ დონემდე, როგორსაც არ მეგონა, რომ ვნახავდი“, - აღნიშნა UNICEF-ის წარმომადგენელმა.
მისი თქმით, ჩრდილოეთ ღაზაში ბოლო ვიზიტის დროს მოქალაქეები მას ეუბნებოდნენ, რომ სჭირდებოდათ ძირითადი ჰუმანიტარული რესურსები.
„რატომ მეუბნებოდნენ, რომ სჭირდებათ საკვები, წყალი და მედიკამენტები? ისინი თვლიან, რომ მსოფლიომ არ იცის, რადგან ეს რომ მსოფლიომ იცოდეს, როგორ შეიძლება ხდებოდეს?” - აღნიშნა ჯეიმს ელდერმა.
