ისრაელის ოფიციალური პირები რაფაჰში დაგეგმილი ოპერაციის შესახებ აშშ-ის შეთავაზების განხილვას დასთანხმდნენ

ისრაელის ოფიციალური პირები დათანხმდნენ, რომ გაითვალისწინებენ აშშ-ის შეშფოთებას ღაზის სექტორის ქალაქ რაფაჰში დაგეგმილი შეტევის შესახებ, - ამის შესახებ ნათქვამია ერთობლივ განცხადებაში, რომელიც აშშ-სა და ისრაელის ოფიციალურ პირებს შორის გუშინ გამართული ვირტუალური შეხვედრის შემდეგ გამოქვეყნდა.

Reuters-ის ინფორმაციით, შეხვედრა, რომელიც თითქმის 2 საათს გაგრძელდა და რომელზედაც სამხრეთ ღაზაში „ჰამასის“ ბოევიკების აღმოსაფხვრელად ალტერნატიულ გზებზე იმსჯელეს, დასრულდა შეთანხმებით, რომ ამ საკითხთან დაკავშირებით მოლაპარაკებები მომავალ კვირაშიც გაიმართოს.

ერთობლივ განცხადებაში ნათქვამია, რომ მხარეებს ჰქონდათ კონსტრუქციული ჩართულობა რაფაჰში დაგეგმილი ოპერაციის საკითხზე და შეთანხმდნენ, რომ იზიარებდნენ მიზანს, რომელიც ქალაქში „ჰამასის“ დამარცხებას ითვალისწინებს.

"აშშ-ის მხარემ გამოხატა შეშფოთება რაფაჰში მოქმედების სხვადასხვა კურსთან დაკავშირებით. ისრაელის მხარე დათანხმდა, რომ გაითვალისწინოს ეს შეშფოთება და მიჰყვეს ექსპერტებს შორის დისკუსიებს", - ნათქვამია განცხადებაში.

ამერიკელმა ოფიციალურმა პირმა განაცხადა, რომ ამერიკულმა მხარემ ეროვნული უსაფრთხოების მრჩეველ ჯეიკ სალივანის, მისი მოადგილე ჯონ ფაინერის და ახლო აღმოსავლეთის ელჩ ბრეტ მაკგურკის ხელმძღვანელობით წარადგინეს წინადადებები, რომლებიც, მათი თქმით, რაფაჰში მშვიდობიანი მოქალაქეების დაცვას ითვალისწინებს.

ვაშინგტონში ისრაელის ოფიციალურმა წარმომადგენელმა განაცხადა, რომ შეხვედრის მონაწილეებს შორის ისრაელის მხრიდან იყვნენ სტრატეგიულ საქმეთა მინისტრი რონ დერმერი და ეროვნული უსაფრთხოების მრჩეველი ცაჩი ჰანეგბი.

შეგახსენებთ, აშშ-ის პრეზიდენტმა ჯო ბაიდენმა ისრაელს მოუწოდა, არ განახორციელოს ფართომასშტაბიანი შეტევა რაფაჰში, რათა თავიდან აიცილოს კიდევ უფრო მეტი მსხვერპლი ღაზის სექტორის მშვიდობიან მოსახლეობაში.

ვახტანგ ძაბირაძე - 30 წელზე მეტია, ჩვენთან ერთად თუ ვინმეა საქართველოს სუვერენიტეტის დამცველი, ჩვენი დასავლელი პარტნიორები არიან
ემილ ავდალიანი - ამიერიდან ირანი და ისრაელი მეტოქეობის განსხვავებულ ეტაპზე გადავიდნენ
ქართული პრესის მიმოხილვა 18.04.2024
კახა ოქრიაშვილი - საქართველოს მოსახლეობის 95% ევროპის გავლენის აგენტები ვხდებით!
საქართველოს ხელოვანები მიმდინარე პროცესებს ეხმიანებიან
Samsung Knox-მა 2024 წლის ტელევიზორებში უსაფრთხოების მაღალი სტანდარტების უზრუნველყოფისთვის CC სერტიფიკატი მიიღო