შალვა პაპუაშვილი - არცერთი NGO არ გამოსარჩლებია ჩვენს მოსამართლეებს და არ უკითხავს, თუ რა მტკიცებულებები დგას მოსამართლეების სანქცირების უკან

ჩვენ ვაპირებთ დავარწმუნოთ ჩვენი მეგობრები, რომ როდესაც არის უსამართლო გადაწყვეტილებები საქართველოს მოქალაქეების წინააღმდეგ, ეს უპირველეს ყოვლისა აზიანებს მათ რეპუტაციას, ვინც ამ უსამართლო სანქციებს აწესებს, - ამის შესახებ საქართველოს პარლამენტის თავმჯდომარემ შალვა პაპუაშვილმა განაცხადა.

პარლამენტის თავმჯდომარის თქმით, არცერთი „ენჯეო“ არ გამოსარჩლებია მოსამართლეებს და არ უკითხავთ, თუ რა მტკიცებულებები დგას მოსამართლეების სანქცირების უკან, რადგან ეს „ენჯეოები“ ფინანსდებიან იმ წყაროებიდან, რომლიდანაც ეს სანქციები მოდის.

„კიდევ ერთი რამ მინდა ვთქვა - არცერთი „ენჯეო“, ამ ქვეყანაში უფლებების დაცვაზე რომ თავი მოაქვთ, არ გამოსარჩლებია ჩვენს მოსამართლეებს. ყველგან მტკიცებულებებსა და ჩანაწერებს რომ ითხოვენ, ნებისმიერ საქმესთან დაკავშირებით, ერთმა „ენეჯეომ“ იკითხა მაინც, რა მტკიცებულებები დგას ამის მოსამართლეების სანქცირების უკან? იცით რატომ არ არის რეაგირება? იმიტომ, რომ ეს „ენჯეოები“ ფინანსდებიან იმ წყაროებიდან, რომლიდანაც ეს სანქციები მოდის და, რა თქმა უნდა, საკუთარი დამფინანსებლის წინააღმდეგ ხმის ამომღებები არ არიან. ეს არის პრობლემა, იმიტომ რომ საბოლოო ჯამში ზოგიერთი ამ „ენჯეოს“ სახით, გვყავს არა საქართველოს სამოქალაქო საზოგადოების წარმომადგენლები, არამედ დონორების წარმომადგენლები, რომლებიც ხმას არ იღებენ, როდესაც საქმე ეხება მათ დონორს“, - განაცხადა შალვა პაპუაშვილმა.