პოლონეთი ღაზაში ისრაელის თავდასხმის შედეგად პოლონელი ჰუმანიტარული მუშაკის დაღუპვის ფაქტზე ისრაელისგან განმარტებებს ითხოვს, - ამის შესახებ პოლონეთის საგარეო საქმეთა მინისტრმა, რადოსლავ სიკორსკიმ განაცხადა.

„ისრაელის ელჩს, იაკოვ ლივნეს სასწრაფო ახსნა-განმარტება პირადად ვთხოვე“, - განაცხადა რადოსლავ სიკორსკიმ.

პოლონეთის საგარეო საქმეთა მინისტრმა დაღუპული მოხალისის ოჯახს სამძიმარი გამოუცხადა და აღნიშნა, რომ ჰუმანიტარული მუშაკის გარდაცვალებასთან დაკავშირებით პოლონეთი საკუთარ გამოძიებას დაიწყებს.

შეგახსენებთ, ჰუმანიტარული ორგანიზაციის, World Central Kitchen-ის ინფორმაციით, ღაზაში ისრაელის სარაკეტო დარტყმას ორგანიზაციის 7 თანამშრომელი ემსხვერპლა. დაღუპულებს შორის ავსტრალიის, პოლონეთის, გაერთიანებული სამეფოს, აშშ-ის, კანადისა და პალესტინის მოქალაქეები არიან.