ანგარიშები, რომლებიც ფინანსთა სამინისტროს გადაეცემა, არ შეიცავს დონორის ვინაობას, სახსრების მიზანსა და იმას, თუ სად იხარჯება ეს სახსრები. ამის შესახებ “ქართული ოცნების” დეპუტატი ლევან ქარუმიძე “ტვიტერში” წერს.

“არა, ნამდვილად არა. ანგარიშები, რომლებიც საქართველოს ფინანსთა სამინისტროს გადაეცემა შეიცავს მხოლოდ მიღებული სახსრების ოდენობას (საგადასახადო მიზნებისთვის), ისინი არ შეიცავს დონორის ვინაობას, სახსრების მიზანსა და იმას, თუ სად იხარჯება ეს სახსრები. ამას დედამიწაზე ყველაზე გამჭვირვალე სექტორს ეძახი?” - წერს ქარუმიძე.

ქარუმიძე ეხმაურება სოციალურ ქსელში დასტინ გილბრესის „ტვიტს“, რომელშიც ნათქვამია, რომ “საქართველოს, ბიუჯეტისა და დაფინანსების მხრივ დედამიწაზე ერთ-ერთი ყველაზე გამჭვირვალე არასამთავრობო სექტორი აქვს.

„სადაა ამის [კანონის] საჭიროება? მთელი უცხოური დახმარება ისედაც აღრიცხულია იუსტიციის სამინისტროში და ანალიტიკური ცენტრები ფინანსურად უფრო გამჭვირვალეები არიან, ვიდრე სადმე სხვაგან დედამიწაზე (ზუსტად, ნახე Transparify-ის ანგარიში)”, - წერს გილბრესი.