სამხრეთ-აღმოსავლეთ ირანში შეიარაღებული დაჯგუფების თავდასხმის შედეგად, სულ მცირე 5 ირანელი ოფიცერი დაიღუპა, - ამის შესახებ ინფორმაციას სააგენტო Reuters-ი ირანულ მედიაზე დაყრდნობით ავრცელებს.

ირანული მედიის ინფორმაციით, სუნიტური დაჯგუფების „ჯაიშ ალ-ადლის“ მებრძოლები რასკსა და ჩაბაჰარში მდებარე ირანის რევოლუციური გვარდიის სამხედრო ობიექტებს თავს დაესხნენ.

„ჯაიშ ალ-ადლის“ თავდასხმის შედეგად, სულ მცირე 5 ირანელი ოფიცერი დაიღუპა და 10 დაშავდა. საპასუხო ცეცხლის შედეგად, დაჯგუფების 8 მებრძოლი დაიღუპა.

ცნობისთვის, „ჯაიშ ალ-ადლი“ ექსტრემისტული სუნიტური დაჯგუფებაა, რომელიც სამხრეთ-აღმოსავლეთ ირანსა და დასავლეთ პაკისტანის ბელუჯისტანის პროვინციაში მოქმედებს.