Human Rights Watch-ი - საქართველოს მმართველი პარტია ძალიან სადავო რუსული სტილის კანონპროექტის ხელახლა წარდგენას გეგმავს - გადაწყვეტილება მის ევროკავშირში ინტეგრაციას რისკის ქვეშ აყენებს
აქამდე ევროკავშირი საქართველოს გაწევრიანების პროცესში წინ წევდა რეფორმებზე შეზღუდული პროგრესის მიუხედავად, “უცხოურ აგენტებზე” კანონს შეუძლია საქართველოს ევროკავშირში ინტეგრაცია ჩაშალოს.
ამის შესახებ ორგანიზაცია Human Rights Watch-ის ევროპისა და ცენტრალური აზიის განყოფილების ინტერესთა დაცვის დირექტორის, ისკრა კიროვას განცხადებაშია ნათქვამი.
მისი თქმით, მიუხედავად ოფიციალური პირების განაცხადისა, რომ კანონები “გამჭვირვალობას” ზრდის, მათი კომენტარები ცხადყოფს, რომ კანონები კრიტიკული ხმების სტიგმატიზებისთვისა და დასჯისთვის იქნება გამოყენებული.
“საქართველოს მმართველი პარტია ძალიან სადავო რუსული სტილის “უცხოური აგენტების” კანონპროექტის ხელახლა წარდგენას გეგმავს, რომელიც სამოქალაქო საზოგადოებისა და დამოუკიდებელი მედიის შეზღუდვას ისახავს მიზნად.
მიღების შემთხვევაში, კანონები, რომელიც წინა წელს მასიური პროტესტების ფონზე უკან გაიწვიეს, უცხოეთიდან დაფინანსებულ არასამთავრობო ორგანიზაციებსა და მედიას მოსთხოვს “უცხოური გავლენის აგენტებად” დარეგისტრირებას. ეს მათ დამატებითი შემოწმებებისა და სანქციების, მათ შორის სისხლის სამართლის სასჯელების სუბიექტად გახდის. ოფიციალური პირების თქმით, კანონები “გამჭვირვალობას” ზრდის, მაგრამ მათი განცხადებები ცხადყოფს, რომ კანონები კრიტიკული ხმების სტიგმატიზებისთვისა და დასჯისთვის იქნება გამოყენებული.
საქართველოს ევროკავშირის კანდიდატის სტატუსი 2023 წლის დეკემბერში მიენიჭა იმის საფუძველზე, რომ სამოქალაქო საზოგადოებისთვის პირობები გაუმჯობესდებოდა. ეს გადაწყვეტილება მის ევროკავშირში ინტეგრაციას რისკის ქვეშ აყენებს, მაშინაც კი, რომ ევროკავშირი აქამდე მზად იყო გაწევრიანების პროცესში ქვეყანა წინ წაეწია ევროკავშირის პრიორიტეტულ რეფორმებზე შეზღუდული პროგრესის მიუხედავად”, - წერს კიროვა.
