ისრაელის თავდაცვის ძალებმა ღაზის სექტორის სამხრეთ ნაწილიდან ერთი ბრიგადის გარდა ყველა ჯარისკაცი გაიყვანეს, - ინფორმაციას Reuters-ი ისრაელის არმიის პრესსპიკერზე დაყრდნობით ავრცელებს.

ამასთან, მას დამატებითი დეტალები არ დაუკონკრეტებია. გაურკვეველია, შეაჩერებს თუ არა ჯარების გაყვანა ღაზას სამხრეთ ნაწილში მდებარე ქალაქ რაფაჰში დაგეგმილ შეჭრას.

ღაზის სექტორის სამხრეთ ნაწილიდან ისრაელელი ჯარისკაცების გაყვანა იმ ფონზე ხდება, როდესაც ეგვიპტე ღაზის სექტორში ცეცხლის შეწყვეტასა და მძევლების გათავისუფლების საკითხზე შეთანხმების მიღწევის მიზნით მოლაპარაკებების ახალი რაუნდის მასპინძლობისთვის ემზადება.

7 ოქტომბერს, „ჰამასის“ მიერ ისრაელზე განხორციელებულ თავდასხმებს დაახლოებით 1 200 ადამიანი ემსხვერპლა, მათი უმეტესობა მშვიდობიანი მოქალაქე იყო. ღაზის სექტორში ისრაელის მიერ დაწყებული საპასუხო შეტევის შედეგად, „ჰამასის“ ჯანდაცვის სამინისტროს ინფორმაციით, დღემდე 33 000-ზე მეტი ადამიანი დაიღუპა. ისრაელის მონაცემებით, „ჰამასმა“ მძევლად ისრაელისა და სხვა ქვეყნების 253 მოქალაქე აიყვანა. დაახლოებით 129 მძევალი გატაცების შემდეგ ამ დრომდე უგზო-უკვლოდ დაკარგულია. მათგან 34 სავარაუდოდ, გარდაცვლილია.