ისრაელსა და “ჰამასს” შორის ცეცხლის შეწყვეტისა და მძევლების გათავისუფლებასთან დაკავშირებით კაიროში მიმდინარე მოლაპარაკებებში მნიშვნელოვან პროგრესს მიაღწიეს, - ინფორმაციას ეგვიპტური გამოცემა Al Qahera News-ი ეგვიპტელ მაღალჩინოსანზე დაყრდნობით ავრცელებს.

ოფიციალურმა პირმა დაადასტურა, რომ გრძელდება მცდელობები ღაზაში ცეცხლის შეწყვეტის შეთანხმების მისაღწევად.

„კაიროში მიმდინარე მოლაპარაკებების რაუნდი თვალსაზრისების დაახლოების კუთხით დიდ პროგრესს განიცდის“, - ციტირებს Al Qahera News-ი წყაროს.

მისი მტკიცებით, მხარეებმა „ძირითად ღერძებზე“ შეთანხმებას მიაღწიეს.

წყაროს ინფორმაციით, კატარისა და „ჰამასის“ დელეგაციები დატოვებენ კაიროს და დაბრუნდებიან ორ დღეში, რათა საბოლოო პირობები შეათანხმონ. აშშ-ისა და ისრაელის დელეგაციები რამდენიმე საათში გაემგზავრებიან, თუმცა კონსულტაციები მომდევნო 48 საათის განმავლობაში გაგრძელდება.