პარლამენტის თითოეულ დეპუტატს, მათ შორის „ოცნების“ თითოეულ წევრს, რომელთაც ჯერ კიდევ შერჩათ უნარი, ემსახურონ არა პარტიას და ივანიშვილს, არამედ ქვეყანას და მის მომავალს, მოვუწოდებთ, მხარი დაუჭირონ ჩვენს კანონპროექტებს - გამოიყენონ ეს უკანასკნელი შანსი და ქვეყნისთვის ამ გადამწყვეტ მომენტში დადგნენ ისტორიის სწორ მხარეს! - ამის შესახებ პარტია "გახარია საქართველოსთვის" დეპუტატმა, ანა ბუჩუკურმა ბრიფინგზე განაცხადა.

მისივე თქმით, ინიციატივებზე უარი კიდევ ერთხელ ნათელს გახდის, რომ „ოცნების“ მიზანი სინამდვილეში არა გამჭვირვალობაა, არამედ საზოგადოებაში დაპირისპირების გამწვავება, ქვეყნის პარტნიორების მტრებად გამოცხადება და ამ მღვრიე წყალში არჩევნების როგორმე თავის სასარგებლოდ გამოყენება.

„დღეს, პარტია „გახარია საქართველოსთვის“ საპარლამენტო გუნდმა პარლამენტის ბიუროს წარუდგინა „რუსული კანონის“ ალტერნატიული პროექტი „ოკუპანტი სახელმწიფოს - რუსეთის ფედერაციის გავლენებისგან დაცვის შესახებ“. დღესვე დავარეგისტრირეთ ცვლილებები კანონში გრანტების შესახებ, რომელიც საჭიროზე მეტ გამჭვირვალობას უზრუნველყოფს და "ოცნებას" ყოველგვარ საფუძველს უკარგავს, მიიღოს რუსული კანონი.

ჩვენს ამ ორ კონკრეტულ ინიციატივაზე უარი კიდევ ერთხელ ნათელს გახდის, რომ „ოცნების“ მიზანი სინამდვილეში არა გამჭვირვალობაა, არამედ საზოგადოებაში დაპირისპირების გამწვავება, ქვეყნის პარტნიორების მტრებად გამოცხადება და ამ მღვრიე წყალში არჩევნების როგორმე თავის სასარგებლოდ გამოყენებაა.

ამ ტრიბუნიდან, პარლამენტის თითოეულ დეპუტატს, მათ შორის, „ოცნების“ თითოეულ იმ წევრს, რომელთაც ჯერ კიდევ შერჩათ უნარი, ემსახურონ არა პარტიას და ივანიშვილს, არამედ ქვეყანას და მის მომავალს, დეპუტატებს, რომლებიც ჯერ კიდევ განასხვავებენ ერთმანეთისგან საქართველოს მტრებსა და მეგობრებს, მოვუწოდებთ, მხარი დაუჭირონ ჩვენს კანონპროექტებს. გამოიყენონ ეს უკანასკნელი შანსი და ქვეყნისთვის ამ გადამწყვეტ მომენტში დადგნენ ისტორიის სწორ მხარეს!

საქართველოს მოქალაქეებს კი შევახსენებთ, რომ არჩევნებამდე სულ რაღაც 7 თვე დარჩა და თქვენს ხელშია ყველაზე ძლიერი ინსტრუმენტი - ევროპას უთხრათ - კი, ხოლო რუსეთს - არა!," - განაცხადა ბუჩუკურმა.