ეს ბრძოლის კანონპროექტია და ჩვენ უნდა დავასახელოთ, თუ ვის ვებრძვით - ვისაც ზოგადად, ამ კანონპროექტით ყველაზე მეტად ებრძვიან, არის აშშ-ი და მგონია, რომ ეს ქვეყანა ჩვენგან ბრძოლას არ იმსახურებს , - აღნიშნული განცხადება “გირჩის“ დეპუტატმა იაგო ხვიჩიამ პარლამენტის ბიუროს სხდომაზე გააკეთა.

“ამ კანონის ამოქმედება ყველასთან ბრძოლა გამოვა - მათ შორის ქართველებთანაც. მე არც ერთ ასეთ კანონს სამყაროში არ ვეთანხმები“, - აღნიშნა ხვიჩიამ.

“უცხოური გავლენის გამჭვირვალობის შესახებ“ კანონპროექტი პარლამენტში ინიცირებულია. მასთან ერთად დაინიცირდა ორი ალტერნატიული პროექტი - ერთია, “ოკუპანტი ქვეყნის - რუსეთის ფედერაციის გავლენებისგან დაცვის შესახებ" პროექტი და “სისხლის სამართლის კოდექსში“ შესატანი ცვლილებები, ხოლო მეორე - “გრანტების შესახებ“ კანონსა და “ბუღალტრული აღრიცხვის, ანგარიშგებისა და აუდიტის შესახებ“ კანონში მომზადებული ცვლილებები.

ბიუროს გადაწყვეტილებით, “უცხოური გავლენის გამჭვირვალობის შესახებ“ პროექტი, ალტერნატიულ კანონპროექტებთან ერთად, განსახილველად იურიდიულ საკითხთა კომიტეტს გადაეცა. კომიტეტის სხდომა 12 აპრილს გაიმართება.