რუსეთის ქალაქ ორსკში საპროტესტო აქცია გაიმართა. ასობით ადამიანი რუსეთის ხელისუფლებისგან დასახლებების წყალდიდობის შედეგად მიყენებული ზარალის კომპენსაციას ითხოვდა. შეკრებილების თქმით, წყალდიდობამ მათი საცხოვრებელი სახლები და ქონება დააზიანა, რის გამოც ისინი ზარალის ანაზღაურებას ითხოვდნენ. მათი თქმით, ადგილობრივი ხელისუფლების მიერ დაპირებული ყოველთვიური კომპენსაცია, 10 000 რუბლის ოდენობით, რაც დაახლოებით 100 დოლარს შეადგენს, არასაკმარისია.

5 აპრილს, რუსეთის ფედერაციის ორენბურგის ოლქში, ორსკში, მდინარე ურალზე კაშხალი გაირღვა, რის შედეგადაც ქალაქის 10 000-ზე მეტი სახლი დაიტბორა. წყალდიდობის საფრთხის წინაშე სხვა ქალაქებიც აღმოჩნდნენ. ოლქში ადამიანების მასობრივი ევაკუაცია დაიწყო. ამ დროისათვის ქალაქიდან 4 000-ზე მეტი ადამიანია ევაკუირებული. ორენბურგის ოლქში ფედერალური დონის საგანგებო რეჟიმი მოქმედებს.