უკრაინის დასახმარებლად, რაც შეგვიძლია, ყველაფერს გავაკეთებთ, - ამის შესახებ არგენტინის პრეზიდენტმა, ხავიერ მილეიმ განაცხადა.

„მთავრობები მუდმივ კონტაქტში არიან, მათ შორის თავდაცვის მინისტრები და დასახმარებლად, რაც შეგვიძლია, ყველაფერს გავაკეთებთ. უკრაინის თავისუფლების დასაცავად ფორუმი გაიმართება, რომლის აქ ჩატარება ზელენსკიმ მთხოვა და ამის გაკეთებას ვაპირებ“, - განაცხადა ხავიერ მილეიმ.

მილეიმ აღნიშნა, რომ უკრაინისა და არგენტინის თავდაცვის მინისტრები სამხედრო დახმარების საკითხსაც განიხილავენ.

„ეს ის არის, რის შესახებაც ჩვენი თავდაცვის მინისტრი საუბრობს, რათა ზუსტად გავიგოთ ის, თუ როგორ შეგვიძლია თანამშრომლობა“, - აღნიშნა არგენტინის პრეზიდენტმა.

ხავიერ მილეის თქმით, 13-15 ივნისს იტალიის პრემიერ-მინისტრის, ჯორჯია მელონის მიწვევით „დიდი შვიდეულის“ სამიტს დაესწრება და ასევე, ვოლოდიმირ ზელენსკისთან შესახვედრად უკრაინაში ვიზიტსაც გეგმავს.

„ჩვენ ვიზიტს ვგეგმავთ და იდეა ის არის, რომ უკრაინაშიც ჩავიდეთ. ჩვენ „დიდი შვიდეულის“ სამიტს დავესწრებით და ჯორჯია მელონის მიწვევისთვის მადლობას ვუხდი. ასევე, მადრიდში ხუან დე მარიანას პრიზის და გერმანიაში ღირსების მედლის მისაღებად უნდა ჩავიდე“, - განაცხადა ხავიერ მილეიმ.