რეფორმებთან დაკავშირებით, რომლებსაც ჩვენგან ევროკავშირი ითხოვს, არაფრის გაკეთებას აპირებენ და როგორც ჩანს, ჩათვალეს, ეს ქვეყანა მათია, რასაც უნდა იმას იზამენ და საერთოდ რუსეთისკენ წაიყვანენ - დასავლეთს შანტაჟის ენით ელაპარაკებიან, - ამის შესახებ „გირჩი - მეტი თავისუფლების“ ლიდერმა ზურაბ ჯაფარიძემ „უცხოური გავლენის გამჭვირვალობის შესახებ“ კანონპროექტთან დაკავშირებით განაცხადა.

როგორც მან „თავისუფლების მარშის" დაწყებამდე აღნიშნა, პროტესტი მაინც მნიშვნელოვანია და მიუხედავად იმისა, თუ როგორ დამთავრდება დღევანდელი მარში, არსებული ხელისუფლების მმართველობა ოქტომბერში მაინც უნდა დასრულდეს.

„რეფორმებთან დაკავშირებით, რომლებსაც ჩვენგან ევროკავშირი ითხოვს, არაფრის გაკეთებას აპირებენ და როგორც ჩანს, ჩათვალეს, ეს ქვეყანა მათია, რასაც უნდა, იმას იზამენ და საერთოდ რუსეთისკენ წაიყვანენ.

მგონია, რომ მათ შორის დასავლეთს, შანტაჟის ენით ელაპარაკებიან. ალბათ, ჰგონიათ, რომ ამით ადამიანებს გატეხენ, ზაფხულამდე კანონს მიიღებენ, შემდეგ ევროპის ჩემპიონატია, ხალხი ყურადღებას გადაიტანს და საარჩევნოდ ველს მოისუფთავებენ.

ჩემი აზრით, არჩევნებზე პრობლემების გარეშე გასვლა მაინც არ გამოუვათ. ნებისმიერ შემთხვევაში, პროტესტი მნიშვნელოვანია. როგორც არ უნდა დასრულდეს პროტესტი, საბოლოო ჯამში, ამ ხელისუფლების მმართველობა ოქტომბერში მაინც უნდა დასრულდეს“,- განაცხადა ზურაბ ჯაფარიძემ.