უკრაინის უმაღლესი რადა დღეს მობილიზაციის შესახებ კანონპროექტს მეორე მოსმენით განხილვას დაიწყებს, მაგრამ ეროვნული უსაფრთხოებისა და თავდაცვის კომიტეტმა მისგან ამოიღო დებულება სამხედრო მოსამსახურეების დემობილიზაციისა და როტაციის შესახებ, - ინფორმაციას უკრაინული მედია ავრცელებს.

მედიის ინფორმაციით, დემობილიზაციის შესახებ პუნქტის კანონპროექტიდან ამოღება ინიცირებული იყო უკრაინის შეიარაღებული ძალების მთავარსარდალ ალექსანდრე სირსკის უკრაინის თავდაცვის მინისტრ რუსტემ უმეროვისთვის გაგზავნილ წერილში, სადაც ის განმარტავს, რომ „კანონპროექტში გარკვეული დებულებები მოითხოვს უფრო დეტალურ ანალიზს და დამატებით შესწავლას“.

სირსკის წინადადებით, „სამხედრო სამსახურიდან გათავისუფლების საფუძვლების საკითხი, ისევე როგორც სამხედრო პერსონალის როტაციის საკანონმდებლო დონეზე შემოღება, ცალკე უნდა იყოს ნორმალიზებული სხვა კანონპროექტში განხილვით“.

უკრაინის უმაღლესმა რადამ მიმდინარე წლის 7 თებერვალს პირველი მოსმენით მიიღო მთავრობის მიერ წარდგენილი კანონპროექტი მობილიზაციის შესახებ. სხვა საკითხებთან ერთად, კანონპროექტი ითვალისწინებდა დებულებებს სამხედრო მოსამსახურეების დემობილიზაციის შესახებ. სახალხო დეპუტატებმა დოკუმენტში მეორე მოსმენისთვის 4 269 ცვლილება შეიტანა.