აქციაზე ხდებოდა „მოლოტოვის კოქტეილის“ სროლის წახალისება, მხარდაჭერა, პოპულარიზაცია, აცხადებდნენ, რომ მაგალითად, პოლიციელი რომ ცოცხლად დაწვა, ეს “მოსულა”. კითხვა პირველი: ვინ აფინანსებდა ამ მარგინალებს? - ამ კითხვით უმრავლესობის წევრი ირაკლი ზარქუა ევროკავშირის ელჩს, პაველ ჰერჩინსკის მიმართავს.

გარდა ამ კითხვისა, ზარქუამ ჰერჩინსკის კიდევ ორი კითხვით მიმართა: „მარგინალი, კანონის დამრღვევია [ნიკა] მელია, რომელსაც გირაო შეეფარდა, ვინ გადაუხადა? მე მაინტერესებს ეს ფონდი, ის ჯგუფი და ორგანიზაცია, ვინც ამ მარგინალებს აფინანსებს“.

„მე მინდა ევროკავშირის ელჩს სამი კითხვა დავუსვა: როდესაც აქციაზე ხდებოდა „მოლოტოვის კოქტეილის“ სროლის წახალისება, მხარდაჭერა, პოპულარიზაცია, დროშაზე და ბანერზე ჰქონდათ გამოსახული, აფრიალებდნენ მომიტინგეებს შორის და აცხადებდნენ, რომ ის რომ ცოცხლად დაწვა შენ, მაგალითად პოლიციელი, ეს „მოსულა“. კითხვა პირველი: ვინ აფინანსებდა ამათ, ამ მარგინალებს? კითხვა N2: მე მაინტერესებს, 2020-ში, როდესაც სამართლებრივად, ობიექტურად ქართველი ხალხის მხარდაჭერით „ქართულმა ოცნებამ“ გაიმარჯვა, მაშინ მაგალითად „ისფედი“, რომელიც იყო პარალელურად დათვლების ორგანიზაცია, აჯანჯღარებდა ამ ქვეყანას და ხალხს ეუბნებოდა, გააყალბეს არჩევნები, გამოდით, ჩამოვანგრიოთ ეს სახელმწიფოო. მაშინ, როდესაც აღმოჩნდა, რომ თურმე ფორმულაში ჰქონდათ შეცდომა და წინასწარვე იცოდნენ 6 თვის განმავლობაში, მათ შორის ევროკავშირის წინამორბედმა ელჩმაც იცოდა.

ეს ქმედება ჩემი ქვეყნის წინააღმდეგ გადადგმული ნაბიჯი იყო, რევოლუციური მოწოდება და დამხობა ლეგიტიმურად არჩეული ხელისუფლების. ევროკავშირის ელჩო, ვინ აფინანსებდა ამ ანტიქართულ, ანტისახელმწიფოებრივ ქმედებებს? თუ არ გახსოვთ, შეგახსენებთ, ამ ფონზე ჩამოვიდა აშშ-ის მაღალჩინოსანი და თქვა, რომ „შებრძანდით“ - ეს მიუღებელია. ოპოზიციას მოუწოდა, რომ შესულიყვნენ პარლამენტში, “ეს კინო ნანახი გვაქვსო”. იძულებული გახდა ის კაცი, იმიტომ, რომ მიხვდა, ეს იყო ანტისახელმწიფოებრივი ქმედება. მე მაინტერესებს, ვინ აფინანსებდა მათ? მესამე კითხვა: მარგინალი, კანონის დამრღვევია [ნიკა] მელია, რომელსაც გირაო შეეფარდა, ვინ გადაუხადა? მე მაინტერესებს ეს ფონდი, ის ჯგუფი და ორგანიზაცია, ვინც ამ მარგინალებს აფინანსებს. იმიტომ რომ ჩვენ ყველამ ვიცით, კანონი უზენაესია, ევროკავშირშია ეს ღირებულება და ამიტომ გვინდა მანდ, რომ ნებისმიერი ადამიანი კანონის წინაშე იყოს თანასწორი. მელიამ დაარღვია, რაც სასამართლომ მიუსაჯა, მოიხსნა და გადააგდო. ანუ ანტისახელმწიფოებრივი ქმედება ჩაიდინა და ამაზე იყო დაკავებული. გირაო შეეფარდა, ვინ გადაუხადა? ანუ ვინ უჭერდა მხარს კანონის დარღვევას. ეს სამი კითხვა მაქვს.

იმაზე არაფერს გკითხავთ, რომ თქვენს სახელმწიფოში, მიღებული გაქვთ ეს კანონი ეროვნულ დონეზე, არც იმაზე, რომ საფრანგეთის ქვედა პალატამ უკვე ამაზე მკაცრი კანონი მიიღო და არც იმაზე, რომ ევროკომისიამ უკვე თავისი დირექტივა გამოსცა და ევროკავშირი, ალბათ, უახლოეს დღეებში ან კვირებში მიიღებს ამაზე უფრო მკაცრ გამჭვირვალობის შესახებ კანონს. ამ კითხვებზე რომ პასუხი გექნებათ, მე მზად ვარ რომ მოგისმინოთ“, - განაცხადა ირაკლი ზარქუამ.

ცნობისთვის, ევროკავშირის ელჩმა, პაველ ჰერჩინსკიმ კითხვას, შეიძლება თუ არა რომ კანონპროექტი „უცხოური გავლენის გამჭვირვალობის შესახებ“ გახდეს დაბრკოლება ევროკავშირისკენ მიმავალ გზაზე, უპასუხა, რომ ეს კანონპროექტი შეუთავსებელია ევროპულ ნორმებთან და ევროპულ ღირებულებებთან და განსაკუთრებით არსებულ კონტექსტში ძალიან რთული იქნება ევროკომისიისთვის, რომ გააკეთოს პოზიტიური შეფასება ამ კანონის მიღების შემთხვევაში.

ელჩმა იმედი გამოთქვა, რომ გამოინახება გზა გამჭვირვალობის უზრუნველსაყოფად, სამოქალაქო საზოგადოების ორგანიზაციების მარგინალიზების, გვერდზე გაწევისა და სტიგმატიზების გარეშე.