მნიშვნელოვანია, სახელმწიფოებრივი მიდგომა ჰქონდეთ ასეთი კომისიის წევრებს, - ამის შესახებ პარლამენტის თავმჯდომარე, შალვა პაპუაშვილმა ცესკოს თავმჯდომარისა და წევრების შერჩევის პროცესთან დაკავშირებით განაცხადა, სადაც ცესკოს წევრობის კანდიდატების შესარჩევ კომისიაში პრეზიდენტის წარმომადგენელმა, ლევან შენგელიამ საკუთარი მონაწილეობა შეაჩერა.

შალვა პაპუაშვილის შეფასებით, სამწუხაროა, თუ წარმომადგენლები გასაუბრებაში არ მონაწილეობენ.

„საზოგადოებამ იცის, რომ მე ზუსტად იგივე კომისიას შევთავაზე მუშაობა, რომელიც თავის დროზე ქალბატონ სალომე ზურაბიშვილის მიერ იყო შერჩეული. ამიტომ, კომისიის პერსონალური, ხელახალი შერჩევა არ დამიწყია. სამწუხაროა, თუ გასაუბრებაში არ მონაწილეობენ. კომისია უფლებამოსილია და მადლობას ვუხდი მათ, რომ აგრძელებენ მუშაობას. ველოდები მათ გადაწყვეტილებას და შემოთავაზებას“, - განაცხადა პაპუაშვილმა.

ცნობისთვის, ცესკოს წევრობის კანდიდატების შესარჩევ კომისიაში პრეზიდენტის წარმომადგენელმა, ლევან შენგელიამ საკუთარი მონაწილეობა შეაჩერა. როგორც ლევან შენგელიამ ჟურნალისტებთან საუბრისას განმარტა, ეს გადაწყვეტილება ერთგვარი სოლიდარობის ნიშანია იმ არასამთავრობო სექტორის წარმომადგენელი წევრების მიმართ, რომელთა ინიციატივაც კომისიამ არ გაითვალისწინა. როგორც შენგელიამ აღნიშნა, მესამე სექტორის ორ წარმომადგენელს გუშინდელ სხდომაზე ჰქონდა განცხადება, რომლის მიხედვითაც, ისინი სამუშაო პროცესში როგორც კომისიის წევრები, მუშაობას შეაჩერებდნენ.