ისრაელის თავდაცვის ძალები ღაზის სექტორისთვის ჰუმანიტარული დახმარების მიწოდების შემდეგ ფაზას აანონსებს.

„ჩვენ ღაზის მშვიდობიანი მოსახლეობისთვის სახმელეთო, საზღვაო და საჰაერო გზით ჰუმანიტარული დახმარების ნაკადის გაზრდის მიზნით, მთელი მსოფლიოს მასშტაბით საერთაშორისო ორგანიზაციებთან და ქვეყნებთან ვიმუშავეთ, რათა ახალი და გაუმჯობესებული ზომები შეგვემუშავებინა“, - განაცხადა ისრაელის თავდაცვის ძალების სპიკერმა, დანიელ ჰაგარიმ.

დანიელ ჰაგარიმ დაადასტურა, რომ ისრაელის თავდაცვის ძალები ისრაელიდან ჩრდილოეთ ღაზაში ახალ სახმელეთო გადასასვლელს აშენებს, რომელიც დღეში სულ მცირე 50 სატვირთო მანქანას მოემსახურება.

ისრაელის თავდაცვის ძალების სპიკერმა აღნიშნა, რომ ეტაპობრივად, ღაზაში ჰუმანიტარული დახმარებით დატვირთული სატვირთოების დღიური რაოდენობა 500-მდე გაიზრდება.