დიახ, ქართველი სამედიცინო სფეროს წარმომადგენლები ვირჩევთ ევროპას და დასავლეთს, - ამის შესახებ მიხეილ სააკაშვილის პირადმა წარმომადგენელმა, სოფო ჯაფარიძემ ექიმებთან ერთად გამართულ ბრიფინგზე განაცხადა.

ჯაფარიძის თქმით, განურჩევლად პროფესიისა თუ პოზიციისა ხმა ყველამ უნდა ამოიღოს და „რუსული კანონის“ წინააღმდეგ ერთად უნდა დადგნენ.

„ქართველი ექიმები ქვეყნის ისტორიის ყველაზე მნიშვნელოვან დროს ყოველთვის იყვნენ, არიან და იქნებიან ჩვენი ხალხის და საქართველოს გვერდით. „რუსული კანონი“ ხელს უშლის ჩვენს ევროპულ ინტეგრაციას. დღეს ყველას კარგად გვაქვს გაცნობიერებული, რომ ვირჩევთ ან დასავლეთს და ჩვენი ხალხის კეთილდღეობას და დამოუკიდებლობას, ან ვირჩევთ ჩრდილოეთს და ვირჩევთ ჩვენი ქვეყნისა და ხალხის კიდევ უფრო მძიმე მდგომარეობას.

ძალიან მნიშვნელოვანია დღევანდელი რეალობა. ეს არის სრულიად ზეპარტიული რეალობა, სადაც განურჩევლად ჩვენი პროფესიისა თუ პოზიციისა ყველამ უნდა ამოვიღოთ ხმა და დავდგეთ ერთად „რუსული კანონის“ წინააღმდეგ.

დიახ, ქართველი სამედიცინო სფეროს წარმომადგენელი ვირჩევთ ევროპას და დასავლეთს. კიდევ ერთხელ ვამბობთ - არა „რუსულ კანონს“,- აღნიშნა სოფო ჯაფარიძემ.