მარტის აქციებზე დაკავებული ლაზარე გრიგორიადისია ბაბუა, გია კალანდაძე პარლამენტთან მიმდინარე საპროტესტო აქციაზე მივიდა.

როგორც მან „ინტერპრესნიუსს“ განუცხადა, „უცხოური გავლენის გამჭვირვალობის შესახებ“ კანონპროექტი არის ანტიევროპული, რის გამოც ის დღევანდელ აქციას შეუერთდა.

„პირველ რიგში, აქ იმიტომ ვარ, რომ ეს კანონი ჩვენმა მთავრობამ არ უნდა მიიღოს, რადგან ანტიევროპული და ანტიდასავლურია. მეორე მიზეზი არის ის, რომ ლაზარე უნდა იდგეს დღეს აქ, მაგრამ გარკვეული მიზეზების გამო, იწელება პროცესი. დღესაც 13:00 სთ-მდე ველოდეთ, რომ დაგვირეკავდნენ. უდიდესი მადლობა მინდა სალომე ზურაბიშვილს გადავუხადო იმიტომ, რომ ლაზარე ნამდვილად უკანონოდ იყო დაკავებული. ლაზარეს შეწყალებით პრეზიდენტმა, სალომე ზურაბიშვილმა ნიშანი მისცა ჩვენს მთავრობას, რომ არასწორად იქცევიან და ქვეყანაში უკანონო, პოლიტიკური დაკავებები ერთხელ და სამუდამოდ უნდა დასრულდეს",-განაცხადა გია კალანდაძემ.

ცნობისთვის, მარტის აქციებზე პოლიციელების ჯანმრთელობის ხელყოფისა და სახელმწიფო ქონების განადგურების ბრალდებით დაკავებული 21 წლის ლაზარე გრიგორიადისი თბილისის საქალაქო სასამართლომ 12 აპრილს დამნაშავედ ცნო და მას 9 წლით თავისუფლების აღკვეთა მიუსაჯა.

მოსამართლე ზვიად შარაძემ ლაზარე გრიგორიადისი ბრალად წარდგენილ ორივე მუხლში, როგორც პოლიციელის ჯანმრთელობის ხელყოფაში, ასევე სახელმწიფო ქონების განადგურებაში დამნაშავედ ცნო.

საქართველოს პრეზიდენტმა, სალომე ზურაბიშვილმა 12 აპრილსვე განაცხადა, რომ მან ლაზარე გრიგორიადისის შეწყალების გადაწყვეტილება მიიღო.