ევროპის საბჭოს ადამიანის უფლებათა კომისარი შალვა პაპუაშვილს წერილს უგზავნის და პარლამენტის წევრებს თხოვნით მიმართავს, „უცხოური გავლენის გამჭვირვალობის შესახებ“ კანონპროექტის მიღებისგან თავი შეიკავონ
ამ კანონის მიღების შემთხვევაში, მისმა იმპლემენტაციამ შესაძლოა გამოიწვიოს სამოქალაქო საზოგადოების ორგანიზაციებისა და მედია საშუალებების სტიგმატიზაცია და დისკრედიტაცია, - ამის შესახებ ევროპის საბჭოს ადამიანის უფლებათა კომისარი, მაიკლ ო'ფლაჰერტი საქართველოს პარლამენტის თავმჯდომარის, შალვა პაპუაშვილისთვის გაგზავნილ წერილში წერს.
„შეშფოთებული ვარ ამ საკანონმდებლო ინიციატივის თავსებადობის საკითხთან დაკავშირებით შეკრებისა და გამოხატვის თავისუფლების სფეროში ადამიანის უფლებათა სტანდარტებთან, მათ შორის, რა შემზარავი ეფექტი შეიძლება ჰქონდეს მის მიღებას მედიასაშუალებებისა და სამოქალაქო საზოგადოების მუშაობაზე, განსაკუთრებით იმ ორგანიზაციებზე, რომლებიც საქართველოში ადამიანის უფლებების, დემოკრატიასა და კანონის უზენაესობის საკითხებზე მუშაობენ”, - წერს ადამიანის უფლებათა კომისარი.
ის საქართველოს პარლამენტის წევრებს მოუწოდებს, თავი შეიკავონ კანონპროექტის -„უცხოური გავლენის გამჭვირვალობის შესახებ“ - მიღებისგან.
„ამ კანონის მიღების შემთხვევაში, მისმა იმპლემენტაციამ, შესაძლოა, გამოიწვიოს სამოქალაქო საზოგადოების ორგანიზაციებისა და მედია საშუალებების სტიგმატიზაცია და დისკრედიტაცია, რომლებიც იღებენ უცხოურ დაფინანსებას და მათ საქმიანობას, მათ შორის ფართო საზოგადოებისა და სახელმწიფო ინსტიტუტების თვალში, რაც, შესაბამისად, გაართულებს ან შეუძლებელს გახდის მათ საქმიანობას. ზემოაღნიშნულიდან გამომდინარე, პატივისცემით ვთხოვ პარლამენტის წევრებს, თავი შეიკავონ წარდგენილი კანონპროექტის -„უცხოური გავლენის გამჭვირვალობის შესახებ“ - მიღებისგან და ითანამშრომლონ ეროვნულ და საერთაშორისო დონეზე პარტნიორებთან, მათ შორის ევროპის საბჭოსთან, იმასთან დაკავშირებით, თუ როგორ უნდა იქნას საუკეთესოდ უზრუნველყოფილი ხელსაყრელი გარემო ქვეყანაში არაკომერციული ორგანიზაციებისა და მედია საშუალებების ლეგიტიმური მუშაობისთვის“, - წერს მაიკლ ო'ფლაჰერტი წერილში, რომელიც 11 აპრილითაა დათარიღებული, თუმცა ქართული მედიისთვის დღეს გახდა ცნობილი.
