ირანის პრეზიდენტი - ირანს ესკალაცია არ სურს
ირანს ესკალაცია არ სურს, - ამის შესახებ ირანის პრეზიდენტმა, ებრაჰიმ რაისმა ვლადიმერ პუტინთან სატელეფონო საუბრისას განაცხადა.
კრემლის პრესსამსახურის ცნობით, ვლადიმერ პუტინსა და ებრაჰიმ რაისს შორის სატელეფონო საუბარი ირანის ინიციატივით გაიმართა.
„ებრაჰიმ რაისმა აღნიშნა, რომ ირანის ქმედებები შეზღუდული ხასიათის იყო. ამავე დროს, მან ხაზგასმით აღნიშნა, რომ თეირანი დაძაბულობის შემდგომი ესკალაციით დაინტერესებული არ არის“, - ნათქვამია კრემლის პრესსამსახურის განცხადებაში.
თავის მხრივ, ვლადიმერ პუტინმა იმედი გამოთქვა, რომ ყველა მხარე თავშეკავებას გამოიჩენს და დაპირისპირების ახალ რაუნდს არ დაუშვებს, რასაც შესაძლოა მთელი რეგიონისთვის კატასტროფული შედეგები მოჰყვეს.
