საქართველოს პარლამენტმა პირველი მოსმენით დაამტკიცა კანონპროექტი „უცხოური აგენტების შესახებ“, რომელმაც ქუჩის მასშტაბური საპროტესტო აქცია გამოიწვია, - ამის შესახებ „დოიჩე ველეს“ სტატიაშია აღნიშნული.

გამოცემა წერს, რომ კრიტიკოსების შეფასებით, კანონი ზიანს მიაყენებს საქართველოს ევროკავშირში გაწევრიანების დიდი ხნის ნანატრ პერსპექტივას.

„კრიტიკოსებმა ის დაგმეს, როგორც „რუსული კანონი“ „უცხოური აგენტების“ კანონმდებლობასთან პარალელების გამო, რომელსაც მოსკოვი კრემლის მიმართ კრიტიკის შესამცირებლად იყენებს“, - აღნიშნულია სტატიაში.

გამოცემა ციტირებს საგარეო პოლიტიკისა და უსაფრთხოების საკითხებში ევროკავშირის უმაღლესი წარმომადგენლის, ჯოზეფ ბორელის განცხადებას, რომლის თქმითაც „ეს კანონი არ შეესაბამება ევროკავშირის ძირითად ნორმებსა და ღირებულებებს და შემოთავაზებული კანონმდებლობა შეზღუდავს სამოქალაქო საზოგადოებისა და მედია ორგანიზაციების თავისუფლად მოქმედების შესაძლებლობებს, გამოხატვის თავისუფლებას და განახორციელებს იმ ორგანიზაციების უსამართლო სტიგმატიზაციას, რომლებსაც საქართველოს მოქალაქეებისთვის სარგებელი მოაქვთ“.

„დოიჩე ველე“ წერს, რომ კანონპროექტი თითქმის იდენტურია იმ წინადადების, რომლის ინიცირების გამო შარშან მმართველ პარტიაზე, მასშტაბური ქუჩის საპროტესტო აქციის შედეგად, ზეწოლა განხორციელდა.

საქართველოში „უცხოური აგენტების შესახებ“ კანონპროექტის ინიცირებასა და პირველი მოსმენით მიღებასთან დაკავშირებით განვითარებულ მოვლენებს ასევე ეხმაურებიან : Reuters-ი, Associated Press-ი, France-Presse-ი, The Guardian-ი, CNN-ი, BBC-ი, Euronews-ი, NBC-ი და სხვა დასავლური მედია საშუალებები.