პარადოქსია, რომ ამ დღეებში, ოპოზიცია და მისი „ენჯეოები“ კრებდნენ ხალხს იმისთვის, რომ ნაკლები სუვერენიტეტი მოეთხოვათ - როგორ შეიძლება ადამიანები იქამდე მიიყვანო, რომ ათქმევინო მას უნდა ჰქონდეს რაც შეიძლება ნაკლები ინფორმაცია,- ამის შესახებ საქართველოს პარლამენტის თავმჯდომარემ, შალვა პაპუაშვილმა განაცხადა, რითაც საკანონმდებლო ორგანოსთან გამართულ საპროტესტო აქციებს გამოეხმაურა.

როგორც პაპუაშვილმა განმარტა, უცხოური დაფინანსება გამჭვირვალე უნდა იყოს.

„გუშინ პრემიერ-მინისტრმა თქვა, რომ 80-იანი წლების ბოლოს რუსთაველზე ქართველი ხალხი იკრიბებოდა იმისთვის, რომ სუვერენიტეტი მოეთხოვათ. პარადოქსია, რომ ამ დღეებში, ოპოზიცია და მისი „ენჯეოები“ კრებდნენ ხალხს, რომ მოეთხოვათ ნაკლები სუვერენიტეტი. გუშინ პრემიერი მედიასაც ჩაეკითხა, როგორ შეიძლება, პარადოქსია იმის დაშვება, რომ ადამიანები იქამდე მიიყვანო რომ ათქმევინო მას უნდა ჰქონდეს რაც შეიძლება ნაკლები ინფორმაცია, თითქოს ბევრი ინფორმაცია მისთვის ცუდია და მავნებელი. ამ პარადოქსამდე არის მისული „ენჯეო“ სექტორი“,- აღნიშნა პაპუაშვილმა.

როგორც პაპუაშვილმა აღნიშნა, პარლამენტი მიიღებს იმ გადაწყვეტილებას, რაც ხალხისთვის საჭიროა.

„რაც შეეხება იმას, თუ რას აკეთებს პარლამენტი. პარლამენტმა, როგორც ხალხის წარმომადგენელმა უნდა გააკეთოს ის, რაც ამ ქვეყნისთვის და ხალხისთვის კარგია. ოპოზიციამ 2022 წელს შეძლო მოქალაქეების გარკვეული რაოდენობის მობილიზება იმისთვის რომ მოეთხოვათ გაგვეშვა მოხალისე მებრძოლები უკრაინაში. უნდა გაგვეშვა? მათ 2022 წელს მოახერხეს ხალხის მობილიზება რუსთაველის გამზირზე, რომლებიც ითხოვდნენ რუსეთისთვის სანქციების დაწესებას. უნდა დაგვეწესებინა? მათ მოახერხეს ხალხის მობილიზება, რომელიც სააკაშვილის გათავისუფლებას ითხოვდა. უნდა გაგვეთავისუფლებინა? ხალხი წყვეტს არჩევნებზე მანდატის მინიჭებით საკუთარ წარმომადგენლებს. პარლამენტში წარმოდგენილია ყველა პოლიტიკური გემოვნება, რაც საზოგადოებაშია. პარლამენტი საზოგადოების ასახვა არის. პარლამენტი მიიღებს იმ გადაწყვეტილებას, რაც საჭიროა ხალხისთვის. ამ დღეებმა კიდევ ერთხელ დაადასტურა „უცხოური გავლენის გამჭვირვალობის შესახებ“ კანონის საჭიროება, უცხოური დაფინანსება გამჭვირვალე იყოს“,- აღნიშნა პაპუაშვილმა.