მნიშვნელოვან საფრთხედ რჩებოდა ოკუპირებული ცხინვალის რეგიონის ანექსიის საკითხი, რადგან, რუსეთის მითითებით, ოკუპირებული რეგიონის რუსეთის შემადგენლობაში შესვლის თემა გარკვეული პერიოდულობით კვლავ აქტიურდებოდა, - ამის შესახებ სახელმწიფო უსაფრთხოების სამსახურის 2023 წლის ანგარიშშია ნათქვამი, რომელიც პარლამენტს უკვე წარედგინა.

მათივე განმარტებით, ანექსიის კუთხით კვლავ განსაკუთრებით მნიშვნელოვან ფაქტორს წარმოადგენს ოკუპირებული რეგიონების ფინანსური დამოკიდებულება რუსეთის ფედერაციაზე.

„ე.წ.-მა პრეზიდენტმა ალან გაგლოევმა განაცხადა, რომ ოკუპირებული რეგიონის მოსახლეობის უმრავლესობა რუსეთის მოქალაქეა და თავს რუსეთის „ნაწილად“ მიიჩნევს. ე.წ. პარტია „ერთიანმა ოსეთმა“ „ინტეგრაციის“ საკითხი რუსეთის დუმასა და პრეზიდენტის ადმინისტრაციაში გამართულ შეხვედრებზე დააყენა. ასევე, რუსეთ-უკრაინის ომში მონაწილე ე.წ.-მა მოხალისეებმა, რუსეთის პრეზიდენტს ცხინვალის რეგიონის რუსეთის შემადგენლობაში მიღება სთხოვეს.

საანგარიშო პერიოდში შეინიშნებოდა რუსეთის საოკუპაციო ძალის მიერ ე.წ. აღმოსავლეთ ოსეთის ცნების დამკვიდრების მიზანმიმართული მცდელობა, რაც მიზნად ისახავდა თრუსოს ხეობის კონფლიქტის ნაწილად ქცევას, ხოლო საქართველოს „აგრესორად“ წარმოჩენას, რომელმაც თითქოს „მიიტაცა“ ოკუპირებული ცხინვალის რეგიონის ტერიტორიები. 2023 წელს განიხილებოდა ოკუპირებულ ცხინვალის რეგიონსა და რუსეთის ფედერაციას შორის ე.წ. საბაჟო გამშვები პუნქტის გამტარუნარიანობის გაზრდისა და საბაჟო გადასახადების მოხსნის საკითხი. ანექსიის კუთხით კვლავ განსაკუთრებით მნიშვნელოვან ფაქტორს წარმოადგენს ოკუპირებული რეგიონების ფინანსური დამოკიდებულება რუსეთის ფედერაციაზე. ცხინვალის რეგიონის ე.წ. ბიუჯეტი დაახლოებით 107 მილიონ აშშ დოლარს შეადგენს, რომლის დაახლოებით 78% (დაახ. 83,2 მილიონი აშშ დოლარი) რუსეთის ფედერაციამ დააფინანსა“, - ნათქვამია ანგარიშში.