პოლონელმა ფერმერებმა პოლონეთ-უკრაინის საზღვარზე მდებარე ორი გამშვები პუნქტის ბლოკადა შეწყვიტეს.

ამის შესახებ ინფორმაციას უკრაინის სახელმწიფო სასაზღვრო სამსახური ავრცელებს.

უკრაინის სახელმწიფო სასაზღვრო სამსახურის ცნობით, პოლონელმა ფერმერებმა შეგინი-მედიკასა და კრაკოვეც-კორჩევას გამშვებ პუნქტებთან საპროტესტო აქციები დღეს, დილის 9:00 საათის შემდეგ დაასრულეს.

„სატვირთო მანქანების რეგისტრაცია და საზღვრის გადაკვეთა ორივე მიმართულებით ჩვეულ რეჟიმში მიმდინარეობს“, - ნათქვამია უკრაინის სასაზღვრო სამსახურის განცხადებაში.

შეგახსენებთ, 18 აპრილს პოლონეთის პრემიერ-მინისტრმა, დონალდ ტუსკმა პოლონელ ფერმერებს უკრაინის საზღვარზე მდებარე სასაზღვრო გამშვები პუნქტების ბლოკადის შეწყვეტისკენ მოუწოდა.