ეკვადორის პრეზიდენტმა ენერგეტიკული კრიზისის გამო საგანგებო მდგომარეობა გამოაცხადა, - ამის შესახებ ინფორმაციას სააგენტო Reuters-ი ავრცელებს.

ეკვადორის პრეზიდენტმა, დანიელ ნობოამ, რომელმაც პრეზიდენტის თანამდებობა 2023 წლის ნოემბერში დაიკავა, რიგით მეორე საგანგებო მდგომარეობა გამოაცხადა.

ეკვადორში ენერგეტიკული კრიზისი „ელ-ნინიოს“ კლიმატური ფენომენით გამოწვეული გვალვის შედეგად წარმოიქმნა, რამაც ჰიდროელექტროსადგურების მუშაობას პრობლემები შეუქმნა.

პრეზიდენტის განკარგულების თანახმად, უახლესი საგანგებო მდგომარეობის მიზანს „ელექტროენერგიის საჯარო სერვისის უწყვეტობის უზრუნველყოფა“ წარმოადგენს.

დანიელ ნობოამ პირველად საგანგებო მდგომარეობა მიმდინარე წლის იანვარში მას შემდეგ გამოაცხადა, რაც ერთ-ერთი ნარკოდაჯგუფების ლიდერი ციხიდან გაიქცა, პატიმრებმა ქვეყნის რამდენიმე ციხეში მძევლები აიყვანეს და მოგვიანებით, შეიარაღებული პირები ეკვადორის ტელევიზიაში შეიჭრნენ.

ძალადობის წინააღმდეგ ბრძოლის მიზნით უსაფრთხოების ახალი ზომების მხარდასაჭერად ხვალ ეკვადორში რეფერენდუმი ჩატარდება.