რუსებმა წუხელ უკრაინას „ისკანდერ-მ“ ტიპის 2 ბალისტიკური რაკეტითა და „შაჰედის“ ტიპის 16 დრონით შეუტიეს, უკრაინელებმა 15 დრონი ჩამოაგდეს, - ინფორმაციას უკრაინული მედია ქვეყნის საჰაერო ძალებზე დაყრდნობით ავრცელებს.

„ღამით ცის დამცველებმა გაანადგურეს 15 „შაჰედი“ მიკოლაივის, ოდესის, კიევისა და ჩერკასის ოლქებში“, - აცხადებენ უკრაინის საჰაერო ძალებში.

მათივე ინფორმაციით, ოკუპანტებმა რაკეტები რუსეთის ფედერაციის ბელგოროდის ოლქიდან გაუშვეს, დრონები კი დროებით ოკუპირებული ყირიმიდან და რუსეთის ფედერაციის კურსკის ოლქიდან.

შეტევა უკრაინის საჰაერო ძალების საზენიტო-სარაკეტო ქვედანაყოფებმა და თავდაცვის ძალების მობილურმა საცეცხლე ჯგუფებმა მოიგერიეს.

შეგახსენებთ, რუსული ძალების მიერ განხორციელებული იერიშის შედეგად ოდესაში შვიდი ადამიანი დაშავდა, მათ შორის ორი ბავშვი და სულ მცირე 14 ბინა განადგურდა.