სტუდენტებმა, რომლებიც “უცხოური გავლენის გამჭვირვალობის შესახებ” კანონპროექტს აპროტესტებენ, პარლამენტის მიმდებარე ტერიტორიიდან საქართველოში ევროკავშირის წარმომადგენლობის ოფისთან მსვლელობით მივიდნენ.

სტუდენტების განცხადებით, ევროკავშირის წარმომადგენლობის ოფისთან გადანაცვლება სიმბოლურია და გადაწყვეტილება მთავრობის წარმომადგენლების მიერ ევროპარლამენტარების მისამართით გამოთქმულ კრიტიკულ განცხადებებს უკავშირდება.

მათი თქმით, ხელისუფლების წარმომადგენლების მხრიდან მსგავსი კრიტიკა მიუღებელია.

ამასთან, აქციის მონაწილეები მოსახლეობას მოუწოდებდნენ, გარეთ გამოსულიყვნენ და პროტესტი გამოეხატათ.

შეკრებილები სკანდირებენ: “საქართველო, საქართველო!”

აქცია ამ დროისთვის დასრულებულია, როგორც შეკრებილებმა განაცხადეს, პროტესტი 24 აპრილს, 19:00 საათზე კვლავ გაგრძელდება.