„რამშტაინის“ ფორმატში უკრაინის თავდაცვის საკონტაქტო ჯგუფის შეხვედრა დღეს გაიმართება
„რამშტაინის“ ფორმატში უკრაინის თავდაცვის საკითხებზე საკონტაქტო ჯგუფის 21-ე შეხვედრა დღეს, ვირტუალურ ფორმატში გაიმართება, - ინფორმაციას უკრაინული მედია ავრცელებს.
უკრაინის პრეზიდენტმა, ვოლოდიმირ ზელენსკიმ ისაუბრა იმაზე, თუ რა საკითხებს განიხილავენ შეხვედრაზე.
„ვემზადებით „რამშტაინის“ შეხვედრისთვის - კონკრეტულად ვისაუბრებთ იმაზე, თუ რამდენად სწრაფად შეგვიძლია გადავლახოთ სირთულეები და პრობლემები, რომლებიც დაგროვდა ნახევარი წლის განმავლობაში, როდესაც ველოდით გადაწყვეტილებებს ამერიკის მხარდაჭერის შესახებ.
მისი თქმით, უკრაინამ პოლიტიკურად უკვე იმუშავა ამ მხარდაჭერის მიღებისთვის.
„ახლა ჩვენ უნდა ვიმუშაოთ პაკეტების საჭირო იარაღით შევსებაზე, ასევე ლოგისტიკის საკითხებზე“, - აღნიშნა ზელენსკიმ.
მან მადლობა გადაუხადა ყველა ქვეყანას, რომლებმაც მიიღეს გადაწყვეტილებები უკრაინის, სამხედროების, ქალაქებისა და თემების დასახმარებლად.
