პირდაპირ ვიტყვი, ეს ტყუილი გაავრცელა „საერთაშორისო გამჭვირვალობამ“, რომელსაც სინამდვილეში უნდა ერქვას "ნაციონალური ბუნდოვანება" - ასეთ ტყუილებს როდესაც ავრცელებს ეს კონკრეტული „ენჯეო“, გასაგებია მათი მიზანი რა არის, - ამის შესახებ პრემიერ-მინისტრმა ირაკლი კობახიძემ ჟურნალისტის კითხვის საპასუხოდ განაცხადა, რომლის მიხედვითაც, ხელისუფლებამ ევროსაბჭოს ანტიკორუფციული შეფასების ანგარიში არ გამოაქვეყნა.

პრემიერ-მინისტრის განცხადებით, დარჩენილია ტექნიკური საკითხები და თარგმნის შემდეგ ანგარიში გამოქვეყნდება.

„ალბათ, გრეკოს ანგარიშზეა საუბარი. პირდაპირ ვიტყვი, ეს ტყუილი გაავრცელა „საერთაშორისო გამჭვირვალობამ“, რომელსაც სინამდვილეში უნდა ერქვას "ნაციონალური ბუნდოვანება". სრულად იმის საპირისპიროა, რაც ჰქვია. "ნაციონალურმა ბუნდოვანებამ", ამ „ენჯეომ“ გამოაქვეყნა ტყუილი იმასთან დაკავშირებით, თითქოს ჩვენ დავმალეთ "გრეკოს" ანგარიში. სინამდვილეში, უკვე გაცემული გვაქვს თანხმობა სტრასბურგისთვის, ევროსაბჭოსთვის იმასთან დაკავშირებით, რომ ეს ანგარიში გამოქვეყნდება. ტექნიკური საქმეა დარჩენილი, თარგმნა. დღეების ამბავია. როგორც კი ითარგმნება, მაშინვე გამოქვეყნდება. ასეთ ტყუილებს როდესაც ავრცელებს ეს კონკრეტული „ენჯეო“, გასაგებია მათი მიზანი რა არის“, - განაცხადა ირაკლი კობახიძემ.

ცნობისთვის, არასამთავრობო ორგანიზაციამ „საერთაშორისო გამჭვირვალობა- საქართველოს“ დღეს განცხადება გამოაქვეყნა, სადაც საუბარია იმასთან დაკავშირებით, რომ "საქართველოს მთავრობა ევროპის საბჭოს GRECO-ს ანტიკორუფციული შეფასების ანგარიშს მალავს". როგორც ორგანიზაციის მიერ გამოქვეყნებულ განცხადებაშია აღნიშნული, სახეზეა საშიში და საგანგაშო ტენდენცია. „საერთაშორისო გამჭვირვალობა - საქართველო“ მოუწოდებს ანტიკორუფციულ ბიუროს, დაუყოვნებლივ გაასაჯაროოს GRECO-ს შეფასების ანგარიში.