„კი ევროპას, არა რუსულ კანონს“ - ამ ლოზუნგით ბათუმში მსვლელობა მიმდინარეობს

„კი ევროპას, არა რუსულ კანონს“, - ამ ლოზუნგით ბათუმში, „ერთიანი ნაციონალური მოძრაობისა“ და "სტრატეგია აღმაშენებლის" ლიდერები და მათი მხარდამჭერები მსვლელობას აწყობენ. საპროტესტო აქციის მონაწილეები, ბათუმის უნივერსიტეტის შენობიდან ევროპის მოედნისკენ მიემართებიან.

„ჩვენი გზა არის ევროპისკენ, გამარჯვებისკენ და ამ გზას გაუმარჯოს. ბათუმის ქუჩებიდან რუსულ ოცნებას ვუთხრათ არა. არა ყველაფერს რუსულს, ევროპას კი, საქართველოს გაუმარჯოს”,- აცხადებენ აქციის მონაწილეები.

მსვლელობამდე ბათუმში, შოთა რუსთაველის უნივერსიტეტთან გაიმართა საერთო საზოგადოებრივი განხილვა - „კი ევროპას, არა რუსულ კანონს!“.

განხილვას დაესწრნენ საზოგადოების წარმომადგენლები, არასამთავრობო ორგანიზაციები, გამარჯვების კოალიციის ფარგლებში „ერთიანი ნაციონალური მოძრაობის“ თავმჯდომარე ლევან ხაბეიშვილი, „სტრატეგია აღმაშენებლის“ თავმჯდომარე გიორგი ვაშაძე და მიხეილ სააკაშვილის პირადი წარმომადგენელი სოფო ჯაფარიძე.