საქართველოს პარლამენტის მიმდებარე ტერიტორიაზე, სადაც აქცია „კი ევროპას, არა „რუსულ კანონს“ მიმდინარეობს, სპეციალური დანიშნულების რაზმი მობილიზდა. სპეცრაზმი პარლამენტის ყველა შესასვლელთანაა განლაგებული.

რუსთაველის გამზირზე შეიყვანეს წყლის ჭავლის მანქანაც.

განსაკუთრებულ დავალებათა დეპარტამენტის წარმომადგენლები იმყოფებიან პარლამენტის ეზოშიც.

პარლამენტთან ვითარება მას შემდეგ დაიძაბა, რაც "უცხოური გავლენის გამჭვირვალობის შესახებ" კანონპროექტის წინააღმდეგ შეკრებილმა აქციის მონაწილეებმა მოითხოვეს, რომ 10 ახალგაზრდა საქართველოს დროშით ასულიყო საკანონმდებლო ორგანოსთან მოწყობილ სცენაზე. აქციის მონაწილეებმა სამართალდამცველებს 5 წუთი მისცეს იმისთვის, რომ ეს საკითხი ხელმძღვანელობასთან შეეთანხმებინათ. დროის ამოწურვის შემდეგ კი ვითარება დაიძაბა, აქციის მონაწილეები რკინის ჯებირების გარღვევასაც შეეცადნენ, რისი უფლებაც სამართალდამცველებმა არ მისცეს.