“ერთიანი ნაციონალური მოძრაობის“ თავმჯდომარეს, ლევან ხაბეიშვილს ფიზიკურად გაუსწორდნენ და მას ვერ პოულობენ. აღნიშნულის შესახებ „ინტერპრესნიუსს“ პარტიაში განუცხადეს.

„ერთიანი ნაციონალური მოძრაობა“ შინაგან საქმეთა სამინისტროს მოუწოდებს, ლევან ხაბეიშვილის ფიზიკური უსაფრთხოება უზრუნველყოს და აღნიშნულთან დაკავშირებით განცხადებასაც ავრცელებს.

„რამდენიმე წუთის წინ, ბიძინა ივანიშვილის პირადი დავალებით, საქართველოში რუსული რეჟიმის წარმომადგენლებმა გაიტაცეს "ერთიანი ნაციონალური მოძრაობის" თავმჯდომარე, პარლამენტის წევრი, ლევან ხაბეიშვილი. დაკავების მომენტში ის აქციაზე დაშავებულ მოქალაქეს ეხმარებოდა. "ერთიანი ნაციონალური მოძრაობა" მიმართავს შინაგან საქმეთა სამინისტროს, უზრუნველყოს ლევან ხაბეიშვილის ფიზიკური უსაფრთხოება და დაუყოვნებლივ გათავისუფლოს ის“, - ნათქვამია პარტიის განცხადებაში.

„ინტერპრესნიუსი“ შინაგან საქმეთა სამინისტროს დაუკავშირდა, სადაც აცხადებენ, რომ მომხდარს არკვევენ.