ჩვენი მიზანი ცეცხლის შეწყვეტის შეთანხმების მიღწევაა, რაც „ჰამასის“ გამო ვერ ხერხდება, - ამის შესახებ აშშ-ის სახელმწიფო მდივანმა, ენტონი ბლინკენმა ისრაელის პრეზიდენტთან, იცხაკ ჰერცოგთან შეხვედრისას განაცხადა.

„ამ ძალიან რთულ დროსაც კი, ჩვენი მიზანია, რომ ცეცხლის შეწყვეტის შეთანხმებას მივაღწიოთ, რომელიც მძევლების სახლში დაბრუნებას ითვალისწინებს - და ამას ახლა მივაღწიოთ. ერთადერთ მიზეზს, რის გამოც ამის მიღწევა ვერ ხერხდება, „ჰამასი“ წარმოადგენს“, - განაცხადა ენტონი ბლინკენმა.

ცნობისთვის, ენტონი ბლინკენი ისრაელში ჩასვლამდე იორდანიასა და საუდის არაბეთში იმყოფებოდა. ისრაელის პრეზიდენტთან შეხვედრის შემდეგ აშშ-ის სახლმწიფო მდივანი ისრაელის პრემიერ-მინისტრს, ბენიამინ ნეთანიაჰუს შეხვდება.