„საერთაშორისო გამჭვირვალობა - საქართველოს“ აღმასრულებელი დირექტორის, ეკა გიგაურის განცხადებით, ევროკავშირის სამეზობლო და გაფართოების საკითხებზე მოლაპარაკებების გენერალურ დირექტორთან, გერტ იან კოპმანისთან აუცილებლად ისაუბრებს „უცხოური გავლენის გამჭვირვალობის“ შესახებ კანონპროექტის საწინააღმდეგო აქციაზე გუშინ განვითარებულ მოვლენებზე.

როგორც გიგაურმა შეხვედრამდე ჟურნალისტებს განუცხადა, ის შეხვედრაზე ყურადღებას გაამახვილებს იმაზეც, თუ როგორ და რა გზით შეიძლება „საქართველო გადაარჩინონ“.

„რა თქმა უნდა, ჩვენი მხრიდან საუბრის მთავარი თემა იქნება ის, თუ სად მიჰყავთ ჩვენი ქვეყანა „ქართული ოცნების“ წარმომადგენლებს. აქ აშკარად არის, რომ მათ გადაწყვიტეს საგარეო კურსის ცვლილება, რომ საქართველო რუსეთის მიმართულებით წაიყვანონ. მათ აღარ უნდათ ევროპა, ნატო, შესაბამისად, აკეთებენ ყველაფერს იმისთვის, რომ ამ მიზანს მიაღწიონ. ეს იქნება ჩემი მხრიდან საუბრის მთავარი თემა, ცხადია, ჩვენ ვისაუბრებთ გუშინ დარბეულ აქციაზეც. კონკრეტულად ვისაუბრებთ, რა უფრო მეტი დაირღვა, ჩვენი მოქალაქეების. აგრეთვე, ვისაუბრეთ იმაზე, თუ რა შეიძლება გაკეთდეს იმისთვის, რომ ჩვენი ქვეყანა გადავარჩინოთ“, - განაცხადა გიგაურმა.